Golden Eye nakabunal na sab

CEBU – Nakabunal na sab daw binugha ang Golden Eye team nga gipangulohan sa ilang shooting guard nga si Noel Medalle kinsa nagmangtas sa iyang mga jumpshots aron pahubsan ang Lakers sa iskor, 67-65 kaniadtong Huwebes sa gabii atol sa nagpadayon nga 1st coach Rady Cup basketball tournament didto sa Vicente Sotto Memorial gym sa barangay Punta Princesa ning dakbayan.

Sa sayo pa, ang Warriors misakmit sa liderato human ilang gipukan ang Viking Haulers sa iskor, 82-74 nga mikamang og balik sa taas sa ilang 3-1 nga baraha.

Nagsige og tira si Medalle gikan sa three-point area ug mihipos og 17 puntos lakip niini ang lima ka triples. Ganado kaayong mitirada’g lagyo si Medalle kay sayon kaayo siyang makapwesto tungod sab sa mga maanindot nga assists gikan ni kanhi UC juniors star Dominic Enriquez kinsa nagkapuliki og lawog sa mga libre niyang kauban aron mahimong sayon ang ilang basketball.

Bisa’g pito lang ka puntos ang nahagdaw ni Enriquez, sakto sab ang suporta sa uban nilang teammates usa na niini si Mark Arias kinsa mitampo og 13 puntos. Maayo na lang gani kay napugngan sab sa Golden Eye ang opensa sa Lakers ug nahimo kining low-scoring ballgame tungod kay abtik ug lisod sab dakpon sila si Viking Rollon ug ex-Jaguar Giovanni Canceko ilabi na kung makahunat na og maayo.

Si Rollon maoy nangu sa pilderong Lakers sa iyang 20 puntos samtang si Canceko mihipos og 17 puntos apan ang ilang team misarasay ngadto sa 1-3 nga baraha.

Ang kadaugan naghatag sa Golden Eye og 2-2 nga baraha ug nagtabla na sila karon sa Viking Haulers.

Si Dondon Cadungog maoy nangu sa Warriors pinaagi sa iyang 28 puntos nga misakmit sa liderato sa ilang gihuptan nga 3-1 nga baraha samtang sila siJunbel Llegunas ug Tata Laborte mi-iskor og 14 ug 13 puntos mata’g usa kanila aron pangulohan ang Viking Haulers.

Puntos kada usa:

First Game:

Warriors (82)— Cadungog 28, Marata 12, Llegunas 10, Enriquez 8, Navaja 7, Grant 6, Alob 6, V. Cadungog 3, Abella 3

Viking Haulers (74)—Llegunas 14, Laborte 13, Cal 9, Arreglo 9, N. Laborte 8, Ylanan 8, Camacho 6, B. Medalle 5, Zapanta 2

Second Game:

Golden Eye (67)— N. Medalle 17, Arias 13, Beltran 8, Tabar 7, Enriquez 7, Marata 7, Rama 5, Cedeño 3

Lakers (65)—Rollon 20, Canceko 17, Cañete 8, Rama 8, Enriquez 8, Guy 2, Jao 2  – BANAT NEWS