CEBU - Ang grandslam champion University of San Jose-Recoletos (USJ-R) Jaguars makigtigi sa runner-up University of Southern Philippines Foundation (USPF) Panthers karong adlawa sa pagpadayon sa Cebu Schools Athletic Foundation, Inc. (CESAFI) volleyball tournament diha sa University of the Visayas (UV) gym.
Ang USJ-R belles ni Cebu Sports Hall of Famer coach Grace Antigua nga nagtinguhang mosakmit sa ikaupat nga sunod-sunod nga korona pangulohan sa kanhi sakop sa RP Youth nga sila si Genie Sabas ug Michelle Simbajon uban nilang Cristy Aina Laroga, Joy Bonita, Avegale Getuaban ug Rachel Hannah Singson, ang sakop kanhi sa USC Lady Warriors basketball team.
Sa laing bahin, ang USPF pangulohan sab nilang 2008 Nestea Beach Volley finalists Ericka Camille Verano ug Harlene Ybarita, uban nilang Yvonne Verano, Lovena Pepito, Charrylou Paden ug Apple Saraum.
Ang laing kumbati sa buntag sa women's division, ang Cebu Doctors' University (CDU) moharong sa host University of the Visayas (UV), sundan sa duwa tali sa University of San Carlos (USC) ug sa University of Cebu (UC).
Sa men's division, ang UV ni coach Raffy Briones moharong sa defending champion USC ni coach Norvie Labuga.
Ang USC nga nangampanya sa talagsaong three-peat magsandig ni two-time MVP Roderick Arenasa, Kenneth Bensig, Dexter Tuazon, Jerome Maestre, Bonvie Estrera, Elizon Uy ug Harvey Bernil.
Samtang ang mga duwa sa hapon, ang USPF makigpinaksitay sa CDU sa unang duwa ug ang UC makigbugno sa Cebu Institute of Technology (CIT) sa katapusang duwa. (THE BANAT)