CEBU - Ang Bio-Fresh ug Liquid Tile mikulit sa ilang ikaduhang sunod-sunod nga kadaugan sa Season 2 sa United Architects Basketball Club (UABC) nga giulohan og "Davies Cup" niadtong Domingo didto sa Kinetic Centrum sa Benedicto College sa A.S. Fortuna street, Mandaue City.
Ang Bio-Fresh yano kaayong miposte og daog pinaagi sa paglubong sa Sportswriters Association of Cebu (SAC) 61-46, samtang ang Liquid Tile mipabuhagay sa ilang mapintas nga pangatake sa second quarter aron pagpulpog sa Sun & Rain, 65-55.
Si Genaro Bejo mibugha og 25 puntos uban ang walo ka rebounds ug tulo ka steals alang sa Bio-Fresh. Si Carl Mantos midugang og 16 puntos, gisundan ni Ian Anthony Osmeña sa iyang sayes puntos ug lima ka rebounds alang sa Bio-Fresh kinsa mi-abante og otso puntos sa unang kuwarter, 20-12.
Ang undermanned nga SAC kinsa aduna lamang pito ka players mipakita og maayong labok sa unang tulo ka kuwarter sa wala pa sila masugamak sa katapusang kuwarter. Si Manny Villaruel maoy nangulo sa SAC sa iyang 16 puntos ug milangkat og lima ka rebounds, samtang si Calvin Cordova mitimang og 15 puntos uban ang upat ka rebounds ug tulo ka assists.
Sa laing bahin, si Jay Ramodes mirehistro og double-double nga adunay 18 puntos ug 14 ka rebounds aron pangulohan ang Liquid Tile. Si Erickson Perez mirehistro og 15 puntos, lima ka rebounds ug unom ka assists alang sa Liquid Tile.
Sa lain pang aksiyon, sila si Antonio Decatoria Jr. ug Oliver Tan mibahog og 21 puntos matag usa aron pangulohan ang Powerfloor pagposte og 76-63 nga kadaugan batok sa Megacryl. (THE FREEMAN)