Elmer Bartolo nidominar sa "Run For Your Heart"

CEBU - Misakmit na sab og laing titulo si Elmer Bartolo human niya gidominar ang World Heart Day 2008 “Run For Your Heart” niadtong Domingo diha sa Cebu Doctors’ Hospital gym.

Ang lumad nga taga-Davao nga si Bartolo mipukan sa Sugbuanong si Reiz Enriquez aron pagdaog sa iyang ikaduhang sunod-sunod nga lumba dinhi sa Sugbu, samtang si Charlie Beberio nalandig sa ikatulo nga dapit.

Si long distance runner Jeepy Lumongsod napunta sa ikaupat nga dapit ug si Kid Dignos maoy mikapyot sa ikalima.

Sa pikas bahin, si Leizsl Lumindas-Getaruelas mibalik na sab pagsulbong human mapilde ngadto ni Monaliza Ambasa sa Davao sa Don Sergio Osmeña Sr. Memorial Run niadtong miaging bulan.

Si Madeline Carter mipahiluna sa ikaduha, samtang si Merlita Arias nalabay sa ikatulong dapit. Nikompleto sa top five mao sila si Janice Ramos ug Sarah Dupio.

Sa doctors category nga aduna say gilay-on nga 10 kilometros, si Potenciano ‘Yong’ Larrazabal III nagpabiling hari. Ning higayona, gipilde ni Larrazabal si Glenn Cang aron sa pagpahiluna sa kinatas-ang dapit, samtang si Raymund Bontol mitapos sa ikatulo.

Sa karera sa mga babayeng doktor, ang nag-unang tulo ka finishers mao sila si Emily Estrada, Rosan Trani ug Nicole Cang.

Sa 6K MEPZ class, si Gardo Bartial maoy nahimong kampiyon sa mga lalaki, samtang si Fria Marie Gani   labing kusog sa habig sa babaye.

Sa laing bahin, sila si Mc Louie Cuyos ug Catherine Marie Cuyos maoy naghari sa tagsa-tagsa nila ka dibisyon sa 3K action. – BANAT NEWS