Dumlog, Tabunok magsangka sa kampiyonato
CEBU - Gipalagpot sa Dumlog ug Tabunok 1 ang ilang tagsa-tagsa ka kaatbang aron pag-angkon og luna sa finals sa seniors division sa Talisay City Mayor’s Cup 2008 basketball tournament niadtong Lunes sa gabii didto sa Talisay City Sports and Cultural Complex.
Ang Dumlog mipukan sa Poblacion 1 sa iskor nga 113-106, samtang ang Tabunok 1 miunay og buntog sa ilang silingan nga Tabunok 2 sa iskor nga 79-76.
Ang Tabunok 1 kanunay nga naggukod ug gani gilubong kini og 12 puntos paghuman sa unang 10 minutos sa duwa. Hinuon, gikalingawan og kitkit ang labaw sa sunod nga duha ka kuwarter hangtod nga ilang nailog ang labaw dihang ilang gilupig sa pinuntosay ang Tabunok 2 sa iskor nga 21-14 sa fourth quarter aron pag-ilog sa labaw dayon na sa pagposte og tres puntos nga kadaugan.
Si Mark Apa maoy topscorer sa Tabunok 1 sa iyang 29, gisundan ni RG Rios pinaagi sa iyang 25 puntos. Ang naparot nga Tabunok 2 gipangulohan ni Peter Jake Alferez nga mibugha og 28 puntos.
Sa laing bahin, ang Dumlog nga wala kaayo maglisod pagposte og daog gipangulohan ni Rex Basillote sa iyang 28 puntos. Tulo sab ka magduduwa ang milansang og double figures alang sa Dumlog.
Ang Poblacion 1 gipangulohan sab ni Diosdado Iglamo kinsa mipabuto og 30 puntos, gisundan ni Allan Abellana nga miamot og 24 puntos.
Sa kumbati sa SK division, ang Tanke miposte og ligas kaayo nga kadaugan batok sa Lagtang sa iskor nga 67-65, samtang ang Dumlog miposte sab og daog batok sa San Roque sa iskor nga 78-71. -Yoyo R. Abayan (BANAT NEWS)
- Latest
- Trending
