Black-jack ni Norman

CEBU - Niadtong Huwebes sa gabii, nagbaha ang Taft Avenue ug nagbanaw sa Katipunan Avenue dili tungod sa bagyong Ofel kun dili tungod sa UAAP season 71 finals.

Ingon kuno niadto ang nasinati. Naglunop sa luha ang mga dumadapig sa De La Salle University (DLSU) Green Archers ug nangabasa ang mga supporters sa Ateneo de Manila University (ADMU) Blue Eagles tungod sa kadaghan sa gipasirit nga "champagne" atol sa ilang pagsaulog sa kampiyonato sa UAAP dihang ilang nabihag ang Green Archers, 62-51 sa Game-2 sa finals didto sa Araneta Coliseum sa Quezon City.

Mao kadto ang unang kampiyonato ni coach Norman Black isip coach sa Ateneo kinsa katapusang nidaog og korona sa UAAP niadtong 2002 ubos ni coach Joel Banal. Sa una niyang tuig nga pagtimon sa Blue Eagles, mi-abante dayon sa finals si Norman Black apan gipakuratan sila sa University of Sto. Tomas (UST) Growling Tigers ni coach Pido Jarencio niadtong 2006. Midaog sa Game-1 ang Ateneo, apan giharos sa Tigers ang duha ka duwa.

Sa miaging tuig, wala makaabante sa finals ang Ateneo ug wala sila mag-abot sa Green Archers kinsa mi-sweep sa University of the East (UE) Red Warriors diin nagpalabwanay sa abilidad ang managsuong Pumaren -- Franz kinsa maoy ni-coach sa La Salle ug Dindo sa UE.

 Daw naka-black jack si coach Norman Black karong tuiga   gumikan kay maayong nakaduwa ang iyang mga sinaligan lakip ang team captain nga si Chris Tiu ug ang iyang duha ka soulmates nga si Fil-Arab Rabeh Al-Hussaini kinsa maoy MVP ug si Fil-Nigerian Job Nkemakolam.

Dili malilong, si Black maayo gyung laki kay iyang napa-grandslam ang San Miguel sa PBA ug karon, collegiate na sab ang iyang gihimong kampiyon.        

 Sa wala pa madungog og maayo ang gitawag og Ateneo-La Salle rivalry, dugay na kini nato nasaksihan dinhi mismo sa Sugbu ug igo na lang misundog ang Manila. Ambot ug nasayod ba kamo nga dihay usa ka duwa sa 1974 finals sa karaang CAAA tali sa UV Green Lancers ug SWU Cobras nga wala gyud gani mahuman kay sa first quarter pa lang nagsinukmagay na sila si Hermes Sumalinog sa UV ug si Satur Aquino sa SWU diin ang iskor, 14-6 pabor sa UV. Niadtong tuiga, walay gideklarar nga kampiyon. Lakip sa mga star players niadtong panahona mao si CESAFI deputy commissioner Danny Duran (ambot nganong Danny man ni siya nga Mitchel man unta ang iyang tinuod ngalan), Paul Velasco, Marlowe Jacutin, Nick Seno ug ang UV Baby Lancers coach nga si Delfin 'Jun' Pepito.

Wala madugay, may sinukmagay sab tali sa UV ug SWU sa tuig 1983 dihang nagkainitay sila si Anthony Mendoza sa UV ug si George Bolen sa SWU. Ang katapusang away tali sa duha nahitabo sa tuig 1996 dihang nagsinukmagay sab sila si Gabriel Maloloy-on sa UV ug si Cezar Romero sa SWU ug nalakip sa lamok-lamok sila si James Laygo, Sanshane Barita ug Roy Vistal sa SWU.

Ang rivalry sa Ateno-La Salle makapaso sa kainit apan mas init ang UV-SWU rivalry.

* * *

 Tungod sa maong korona sa UAAP 2008, atong pahalipayan ang duha ta ka higala nga si Jack Huang sa Hapee Toothpaste nga alumnus sa Ateneo ug si Bogo Bogoys coach Sumalinog kay ang iyang anak nga si Christopher usa man sa sakop sa champion team. Naglaraw kuno ang Ateneo team manager nga si Manny V. Pangilinan nga pabakasyonon ang iyang players ngadto sa Europe isip bonus sa ilang pagdaog. Happy trip to all of you. Keep spreading your wings, EAGLES.

* * *

 Karong gabhiona, magtiwas ang NCAA defending champion San Beda College (SBC) Red Lions ug ang Jose Rizal University (JRU) Heavy Bombers alang sa ilang rubbermatch sa best-of-three finals sa NCAA 84 season didto gihapon sa Araneta Coliseum. – BANAT NEWS