Alliance Software, Icomm mikastigo sa ilang kontra

CEBU - Ang Alliance Software ug Icomm mimakmak sa ilang tagsa-tagsa ka kaatbang sa 7th Thirsty Hoop Jamps Inter-Company basketball tournament didto sa BRIGHT Academy gym sa barangay Banilad, ning siyudad.

Ang Alliance nagsalig sa ilang kainit sa pagsugod sa duwa aron pagpukan sa Blumango Technology, 63-55, samtang ang Icomm milubong sa Trax Technology 63-40.

Human milabaw og singko puntos, 38-33 sa halftime, ang Alliance Software milusad og laing dakung rally, 17-9 aron pagposte og 14 puntos nga labaw, 55-41 sa third quarter. Ang Alliance Software wala na mahulga hangtod nga napupos ang oras sa duwa.

Si Raymond Rizada may dakung natampo nga iskor alang sa Alliance Software sa iyang 21 puntos, samtang si Jess Minoza mikimada og 14 puntos.

Nangulo sa pilderong Blumango mao si Francisco Matugas sa iyang 15 puntos, gisundan nilang Kristian Jabiles ug Mark Matidios nga mihirit og 10 puntos matag usa.

Sa laing duwa, ang Icomm wala moagi’g kalisud sa maong kumbati human makaangkon og 19-7 nga bentaha sa first quarter ug nagkatubo ang labaw sa matag kuwarter hangtod nga ilang nakuha ang 23 puntos nga kadaugan.

Si Evert Canada mikutlo og 19 puntos alang sa Icomm, si Tomas Estrada mitampo og 15 puntos, si Orven Enoveso miamot og 10 puntos.

Puntos Matag Usa

Unang duwa:

Alliance Software (63) - Rizada 21, Miñoza 14, Bistorillo 7, Lim 6, Candia 5, Maranan 4, Abringe 2, Sy 2, Sanchez 2

Blumango Tech (55) - Matugas 15, Matidios 10, Jabiles 10, Colao 8, Bacayo 5, Ampalayo 5, Paculaba 2

Ikaduhang duwa:

Icomm (63) - Canada 19, Estrada 15, Enoveso 10, Godoy 6, Corbo 5, Buenaventura 4, Osumo 4

Trax Technology (40) - Pañares 9, Pepito 9, Felomino 8, Tan 5, Pejo 5, Galan 4. – BANAT NEWS