Lumapguid nanghawod sa SAC-Hapee sports quiz

CEBU - Ang tinun-an sa Mandaue City Comprehensive National High School nga si Johniel Lumapguid maoy nanghawod sa 27 ka mga partisipante sa 1st SAC-Hapee Sports Quiz kagahapon didto sa Ayala Activity Center.

Si Lumapguid, ang sportswriter sa ilang school publication ug adunay dakung kaalam sa nagkalain-laing sporting events maoy mipatigbabaw sa maong sports quiz.

Ang Mandaue City Comprehensive National High School mitapos og 1-2 finish human si Christian Kenneth Otiong milangkat sa ikaduhang dapit human midaog sa tie-breaker batok ni Tyrll Adolf Itong sa Cebu Normal University ug Jude Rhomas Yapjoco sa Sacred Heart School-Jesuit.

Si Ricardo Cabigas Jr. sa Abellana National School maoy mikapyot sa ikalimang dapit.

Mokompleto sa top 10 finalists mao sila si Guiliano Galicia ug Charles Daniel Ding sa Bright Academy, France Kevin Degamo sa Cebu City National Science High School, Abby Niles Cuenco sa Sacred Heart School-Jesuit, Mark Anthony Esperida sa University of the Philippines ug ang bugtong babayeng finalist nga si Marie Alyssa Yee sa Sacred Heart School-Hijas De Jesus.

Si Lumapguid nakadawat og ASUS EEE laptop bugti sa iyang pagdaog sa kampiyonato. Si Otiong nidaog og Nokia 7310 cellphone, si Itong nakadawat 2680 cellphone, samtang sila si Yapjoco ug Cabigas nidaog sa Philips Go Gear MP3 players.

Gawas sa mga sertipiko, ang non-winners nakadawat sab og Hapee Toothpaste gift items agi’g pahalipay sa ilang pagsalmot sa maong kompetisyon nga kabahin sa pagsaulog sa Cebu Press Freedom Week.

Ang Sports Quiz maoy unang dakung kalihukan sa Sportswriters Association of Cebu (SAC) ubos sa liderato ni John Z. Pages. Ang SAC usa ka kahugpongan sa mga sportwriters gikan sa tulo ka Cebu dailies -- The Freeman, SunStar ug Cebu Daily News, Banat News ug Superbalita. - BANAT NEWS