Team-B wa pay pilde

CEBU - Nagpabiling walay pilde ang Team-B human mihakot og daog batok sa Team-C, 87-83   sa pagtapos sa elimination round sa TTH Basketball Club niadtong Martes didto sa USC North Campus gym sa Gen. Maxilom Avenue, ning dakbayan.

Ang Team-B mao kanunay ang nagsige og labaw ug miposte sa ilang kinadak-ang labaw nga 14 puntos, 49-35 sa halftime. Ang 25-20 nga rally sa Team-C sa fourth period nahulog na lang sa walay silbe kay wala magpadala sa defensive pressure ang Team-B.

Si kanhi Baby Warrior Fritz Villamor mipabuhagay og 28 puntos alang sa Team-B, samtang sila si Jerlo Aguas ug Hiram Cuyno mi-iskor og 18 ug 17 puntos ug si Anton Colmenares mitampo og 10 puntos.

Ang Team-C gipangulohan ni Elvis Labares kinsa mihagdaw og 32 puntos, gisundan ni Henry Mancera sa iyang 24 puntos.

Sa laing duwa, ang Team-A mipakurat sa mas lig-on nga Team-D dihang ila kining naapsan aron pag-iskor og 65-64 nga kadaugan.

Si Jonathan de Leon maoy bida sa Team-A dihang   iyang napasulod ang lay-up sa katapusang sayes segundos aron masakmit ang ikaduhang kadaugan sulod sa lima ka duwa.

Apan si Deodato Lunday maoy nangu sa maong kadaugan pinaagi sa iyang 19 puntos, samtang sila de Leon, Carl Umabong ug Kenneth Quiñanola mitampo og 10 puntos matag usa.

Ang Team-D gipangulohan ni Mark Villagonzalo sa iyang 13 puntos ug sila si Homer Lim ug Martin Grogard miamot og 11 puntos matag usa kanila.

PUNTOS MATAG USA

Unang duwa:

Team-B (97) -- Villamor 28, Aguas 18, Cuyno 17, Colmenares 10, Huntar 8, G. Uy 2, Ho 2, Aballe 2

Team-C (83) -- Labares 32, Mancera 24, Policios 16, Lim 7, J. Uy 4

Ikaduhang duwa:

Team-A (65) -- Lunday 19, Umabong 10, Quiñanola 10, De Leon 10, Yap 7, Gica 5, K. Lim 2, Aclan 2

Team-D (64) -- Villagonzalo 13, Grogard 11, H. Lim 11, Castañeda 10, Chua 6, Enricuso 4, Sestoso 4, Noel 3, Bullo 2 (BANAT)