CEBU - Nakabawi ang MLSDF Selection sa ilang bugnaw nga duwa sa unang hugna pinaagi sa pagpahungaw sa ilang kainit sa mosunod nga tulo ka kuwarter aron paglubong sa University of Southern Philippines Foundation (USPF) Baby Panthers, 93-58 sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.
Ang MLSDF milabaw lang og uno punto, 14-13 paghuman sa unang 10 minutos sa duwa. Apan ilang gibuak ang ilang kabugnaw pinaagi sa paglusad og 25-14 run aron pag-angkon og 12 puntos nga bentaha, 39-27 sa first half.
Sukad niadto wala na kapugngi sa ilang pagratsada ang MLSDF Selection ni MLSDF executive director Eddie B. Ybañez ug ila pa gani nga gipalapdan ang ilang labaw ngadto sa 26 puntos paghuman sa third quarter.
Ang MLSDF Selection milusad og laing 30-19 nga rally aron inudnod og maayo ang USPF Panthers kinsa gilubong og 35 puntos sa katapusang gutlo sa duwa nga maoy labing dakung kadaugan ning duha ka bulan nga torneyo.
Sila si Mark Panerio, Christopher Cabahug ug Ronron Cabahug maoy nangulo sa MLSDF Selection nga mikimada og 12 puntos matag usa.
Sa maong kadaugan, ang MLSDF Selection temporaryo karong nag-una sa liderato bitbit ang 3-0 win-loss record, samtang ang USPF Panthers nakatilaw sa ilang ikaduhang sunod-sunod nga kapildihan.
PUNTOS MATAG USA
MLSDF (93) -- Panerio 12, EC Cabahug 12, R. Cabahug 12, Ferraren 9, Ybañez 9, Sebial 6, Palos 6, Tulda 6, Bucayan 5, Tabalin 5, Villanil 4, Oteda 4, Banate 4
USPF (58) -- Maraño 16, Cabatingan 10, Misa 9, Loberanes 7, Unabia 6, Pogoy 4, Daan 4, Manzo 2 (BANAT NEWS)