RemEMBER nakaipsot sa Ave Maria

CEBU - Ang team RemEMBER mipahamtang sa Ave Maria Sanctuary Park sa ilang labing unang kapildihan, apan nag-agi pa kini og gansalon nga dalan una maangkon ang 82-81 nga kadaugan sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Naglabaw kanunay ang Ave Maria halos sa tibuok duwa lakip na ang 67-58 human sa tulo ka kuwarter, apan ang team RemEMBER ni Consolacion Vice Mayor Ember V. Alinsug ug Poblacion Oriental Brgy. Councilor Paul Alelu Q. Flores mibawos pinaagi sa nagpungasi nga opensiba nga miresulta sa panagtabla, 80-all sa nahabiling 32 segundos sa kumbati.

Sa sunod nga posisyon, si Abing nakakuha'g foul, apan igo lang nakapasulod og usa sa duha ka free throws aron tunolan ang Ave Maria ni coach Marlon Piodo og uno punto nga bentaha, 81-80.

Subling nakatabla ang RemEMBER, 81-all pinaagi sa free throw ni Somosot sa nahabiling 23 segundos sa duwa.

Maangkon unta sa Ave Maria ang daog, apan wala kini makahimo og maayong duwa sa final possession.

Si Ermac milubong og usa sa duha ka free throws nga igo na kaayong nakapadaog sa RemEMBER.

Sa maong kadaugan, ang RemEMBER nakig-uban sa ilang biktima sa ikaduh    ang dapit sa overall standings sa managsamang 2-1 win-loss records ning duha ka bulan nga kompetisyon nga gipasiugdahan sa M. Lhuillier Sports Development Foundation (MLSDF) pinaagi sa paningkamot sa ilang executive director Eddie B. Ybañez.

PUNTOS MATAG USA

Remember (82) - Dahil 25, Valle 18, Medida 13, Dumaguit 7, Gonzaga 6, Pilapil 4, Ermac 3, Bio 3, Somosot 2, Tudtud 1

Ave Maria (81) - Abing 31, Montenegro 20, Olbedado 10, Trillo 5, Pacindo 4, De la Rama 4, Sayman 3, Igoña 3, Senining 1  (BANAT NEWS)