Power Forty Christmas League sugdan karon

CEBU - Unom ka koponan ang mosalmot sa Power Forty Christmas League nga buksan karong gabii diha sa Inayawan Sports Complex.Si commissioner Edwin Dejacto mibutyag nga usa sa unom ka teams ang bag-ong misulod ug kini mao ang EBE & Nelly Piggery nga gipanag-iya ni Nilo Nuñez.

Unang mag-abot karong gabii mao ang Christine Traders ni Vez 'El Presidente' Eleguin batok sa Hero Commando ni brgy. Inayawan councilor Jojo Ibones.

Sa ikaduhang duwa, magsangka ang UTASSCO ni Atty. Flor Yosores batok sa Amihan ug sa main game, ang EBE & Nelly Piggery mopakita sa ilang labok batok sa Summer League champion Fag Machine Shop ni team manager Felix Gabiana.

Ang torneyo mosubay og single round robin diin ang top four teams mag-abot sa crossover semifinals. Ang no. 1 moharong sa no. 4 ug ang no. 2 makigsangka sa no. 3. Ang duha ka winners maoy mag-ilog sa korona. 

Tapuson ang torneyo unya sa Disyembre diin adunay pagahimuon nga awarding ceremony ug Power Forty Christmas Party.  (BANAT NEWS)