Suico nagpabiling OPBF lightweight champion

CEBU - Nilampos ang Sugbuanong boksidor nga si Randy “Kumong Bato” Suico pagdepensa sa iyang Oriental Pacific Boxing Federation (OPBF) lightweight champion belt dihang iyang gibuntog ang iyang Hapon nga challenger nga si Nihito Arakawa pinaagi sa majority draw decision niadtong miaging adlaw didto sa Korakuen Hall sa Tokyo, Japan.Duha ka mga hurado ang nirehistro og 114-114 alang sa duha ka boksidor, samtang ang ikatulong hurado nipuntos og 115-114 pabor kang Suico.

Nagkanayon ang manager ni Suico nga si Joe Koizumi nga wala kaayo kapakita og nindot nga away ang Sugbuanong boksidor tungod sa gamay’ng panahon niini sa pagbansay-bansay, si Suico igo lang nag-train sulod sa usa ka buwan sa maong away. Matud pa sa insidesports.com atol sa pagpangandam ni Suico, gikuha niya ang usa sa mga ALA boys nga si Mark Jason Melligen aron mamahimong sparring partner ug didto nakita nga nihinay ang lihok ni Suico.

Kahinumduman nga nasakmit ni Suico ang bakanteng OPBF lightweight belt dihang gipatumba niya sa 9th round ang Thai boxer nga si Pongpetch Chuwatana.

Human sa maong kadaugan ang 28-anyos nga si Suico gikatakdang mobalik og saka sa ring karong umaabot nga Disyembre 20 batok sa No.1 OPBF Contender nga si Ichitaro Ishii. – BANAT NEWS