CEBU – Walay hunong nga nangubkob og daog ang Globe Osam, Blumango ug Alliance Software dihang gipilde ang ilang tagsa-tagsa ka kaatbang sa 7th Thirsty Hoop Jams Inter-Company basketball tournament didto sa BRIGHT Academy Gym sa Banilad, ning siyudad.
Si Nestor Bardillas mipakita na sab sa iyang kabangis sa opensiba diin mipusgay kini og 27 puntos alang sa Globe Osam nga milubong sa VECO, 108-85.
Sa laing mga duwa, ang Blumango mipanton sa Trax Technology, 61-54, samtang ang Alliance Software misakgaw og daog batok sa Protrade, 51-46.
Sila si Tommy Abasolo ug Nestor Atillo mikimada og 13 puntos matag usa, samtang sila si Albert ug Jake Villaver nagkumboya og 23 puntos alang sa Globe Osam nga wala na mokompiyansa human makabentaha og sayes puntos, 56-50 sa first half.
Si Bailey del Castillo miugbok og 24 puntos alang sa VECO, si Sebastian Lacson miugkat og 16 puntos, samtang sila si Kent Alvarado ug Roel Sumalinog mibugha og 10 puntos matag usa, apan wala mosalir ang ilang mga diskarte kay daan na man kining gilumsan og 22 puntos sa fourth quarter.
Sa laing bahin, si Martin Colao maoy nangulo sa Blumango sa iyang 18 puntos, gisundan ni Mark Matidios sa iyang 15 puntos.
Ang Blumango miabante og kuwatro puntos, 27-23 sa halftime, apan ilang gilupig sa pinuntosay ang Trax sa katapusang kuwarter, 19-12 aron pagkandado sa kadaugan. Si Dale Pepito maoy topscorer sa Trax sa iyang 14 puntos.
Mirehistro sab og daog ang Alliance Software human gipukan ang Protrade, 51-46.
Ang Alliance Software gipangulohan ni Jess Minoza pinaagi sa iyang 19 puntos, samtang si Antonio Rivas maoy topscorer sa Protrade sa iyang game-high 30 puntos.
PUNTOS MATAG USA
Unang duwa:
Blumango (61) – Colao 18, Matidios 15, Bacayo 10, Ampalayo 7, Paculaba 6, Salvaleon 5
Trax (54) – Pepito 14, Tan 10, Mante 9, Galan 6, Filomeno 6, Pañares 5, Amon 2, Pejo 2
Ikaduhang duwa:
Globe Osam (108) – Bardillas 27, Abosolo 13, Atillo 13, A. Villaver 12, J. Villaver 11, Casiño 6, Belleza 6, Gera 6, Tabay 6, Languido 5, Bernardino 3
VECO (85) – Del Castillo 24, Lacson 16, Alvarado 10, Sumalinog 10, Canen 6, Timkang 5, Ching 4, Polo 4, Espinosa 2
Ikatulong duwa:
Alliance Software (51) – Miñoza 19, Rizada 10, Bestorillo 8, Demecillo 6, Sanchez 4, Huerte 4
Protrade (46) – Rivas 30, Cuizon 5, Barrientos 4, Flores 3, Rusiana 2, Jabonite 2 – BANAT NEWS