CEBU – Mitambong ang tanang 52 ka partisipanteng koponan gikan sa siyudad ug munisipalidad sa pagbukas sa 4th Governor Gwen Garcia Unity Volleyball Cup for Women kagahapon didto sa Mandaue City Sports and Cultural Complex.
“History continues to be made with all 52 LGUs participating in the GUV Cup ever. This victory, this triumph, kining maong kalampusan, wala gimugna sa usa, duha o pipila lamang ka tawo, gipanag-iya kini sa tanang mga Sugbuanon. Stand proud Cebuanos because today we have truly become a beacon of hope for others. Here in Cebu, it can be done, and we have done it,” matud pa ni Governor Gwen Garcia ngadto sa mga partisipante atol sa iyang pamulong.
Gipaila sab sa Gobernadora ang lima ka players ug pito ka opisyales ngadto sa partisipante atol sa opening ceremony kagahapon ug gituki ang ilang nakab-ot. Gipaila ni Gov. Garcia mao sila si Maria Cristina Lavador, Melissa Ramayla ug Mytha Padillo nga naa karon sa USJ-R, Noreina Castro sa UV ug Rapril Aguilar sa SWU.
Si Garcia ug ang Cebu Volleyball Association (CEVA) mapasigarbuhon sab sa nakab-ot nga kalampusan sa pito ka GUV Cup officials nga naglakip nilang Jerry Winnona Catipay, Juditha Bonita, Janeth Ponte, Lo Oliver Garcia, Rolando Pepito, Jessie Yungco ug Jesmar Ganancial tungod sa ilang pagpasar isip national referees.
Mihakot sab og dungog ang Tuburan human midaog sa "Best in Uniform" award, samtang ang Tabogon maoy nidaog isip "early bird" sa mga entrante nga gikan sa lagyong mga dapit.
Duha ka exhibition games diin nipakita'g aksiyon ang defending city cluster champion Lapu-Lapu City ug municipalities cluster champion Liloan.
Ang Lapu-Lapu City ni national team member ug two-time GUV Cup MVP Jusabelle Brillo mipukan sa ilang karibal Mandaue City sud sa duha ka sets, 27-25, 26-24. Ang Liloan napukan sa Catmon, 22-25, 11-25.
Ang aksiyon sa 4th GUV Cup pormal nga sugdan sunod semana diin ang Minglanilla mo-host sa Cluster I games. – BANAT NEWS