CEBU - Pormal na nga buksan ang 4th season sa Governor Gwen Garcia University Volleyball (GUV) Cup karong adlawa diha sa Mandaue City Cultural and Sports Complex.
Sa labing unang higayon, kompleto ang maong kalihukan kay mosalmot man ang mga siyudad ug mga lungsod nga nasakop sa probinsiya sa Sugbu.
Nasayran, niadtong 2005 aduna lamang kini 38 ka partisipante ug misaka kini ngadto sa 52 ning tuiga nga naghatag og kahinam sa maong torneyo.
“This is a dream come true for CEVA (Cebu Volleyball Association). Governor Garcia gave to us that objective and at last, it is now realized,” matud pa ni Nona Catipay sa CEVA.
Dugang pa ni Catipay nga ang tanang mga duwa ubos sa city cluster adto duwaon sa Bogo pinaagi sa suporta ni Mayor Celestino E. Martinez Jr.
Adunay unom ka provincial clusters diin aduna sab kini duha ka sub-clusters lakip na niini ang Bantayan Island alang sa Cluster IV ug Camotes Island alang sa Cluster V.
Aron paghatag og dugang bulok sa opening ceremony nga sugdan sa alas-9 sa buntag, ang “Garbo sa GUV CUP” awards ang ihatag diin si Governor Gwen Garcia mao mismo ang mohatag.
Ang second batch sa mga honorees kinsa karon nakapahimulos sa athletic scholarships sa ilang tagsa- tagsa ka tunghaan mao silang Ma. Cristina Lavador (Danao City), Melissa Ramayla (Ronda), Mytha Bounsit (Borbon), Norina Castro (Tuburan) ug Rapril Aguilar (Samboan).
Lain pang makadawat og pasidungog mao ang mga national referees nga sila si Jerry Winnona Catipay, Juditha Bonita, Janeth Ponte, Lo Oliver Garcia, Jesse Yungco, Rolando Pepito ug Jesmar Ganancial.
Adunay special awards ang ihatag alang sa best in uniform ug ang kinalay-ang team nga unang moabot.
Magsangka karon sa non-bearing games mao ang Catmon nga mopakita sa ilang abilidad batok sa Liloan, samtang ang Mandaue mosukod sa abilidad sa Lapu-Lapu. (BANAT NEWS)