Globe Osam mipukan sa Alliance Software

CEBU - Miagi pa og makutas nga engkuwentro ang Globe Osam una nila maangkon ang 84-82 nga kadaugan batok sa Alliance Software sa nagpadayong aksiyon sa 7th Thirsty Hoop Jams Basketball Tournament didto sa BRIGHT Academy gym sa Banilad, ning siyudad.

Si Tommy Abasolo mikanlat og 20 puntos ug si Nestor Atillo miligwat og 18 puntos alang sa Globe Osam nga nagpabiling mitungtong sa taas nga dapit sa standings bitbit ang limpiyong 6-0 win-loss record.

Sila si Nestor ug Gera miamot og 13 puntos matag usa alang sa Globe Osam, kinsa mi-rally sa ikaduhang kuwarter aron pag-ilog sa labaw, 37-30 sa first half.

Sa katapusang duha ka kuwarter, gikontrolar na sa Globe Osam aron pagposte sa ilang ikaunom nga kadaugan.

Si Jess Miñoza mibahog og 28 puntos ug si Raymond Rizada mitampo og 20 puntos, apan nausik ang ilang mga paningkamot kay wala kini makapadaog sa ilang koponang Alliance Software kinsa nakatilaw sa ilang ikatulong kapildihan sa lima ka duwa.

Sa laing duwa, ang VECO miratsada pagsugod sa duwa aron paglubong sa Blumango Technologies, 76-64. Ang VECO nitarok na og 4-2 win-loss record.

Gisugdan sa VECO ang duwa pinaagi sa pagposte og 24-13 sa first quarter ug wala kini molingi pa sukad niadto. Giinat pa gani nila ang labaw ngadto sa 15 puntos pagsugod sa final quarter.

Si Kent Alvarado maoy nangu sa VECO pinaagi sa iyang 14 puntos, si Arnulf Santos mitunol og 13 puntos ug si Bailey del Castillo midonar og 12 puntos.

Sila si Mark Matidios ug Francisco Matugas nga mi-iskor og 17 puntos matag usa maoy nangulo sa Blumango nga kasamtangang nagtangag og 3-2 nga baraha.

PUNTOS MATAG USA

Unang duwa:

VECO (76) - Alvarado 14, Santos 13, Del Castillo 12, Canen 9, Sumalinog 9, Rodriguez 5, Omboy 4, Rabillas 4, Grafiul 4, Timkang 2

 Blumango (64) - Matidios 17, Matugas 17, Colao 8, Jabiles 8, Paculaba 7, Bacayo 7

Ikaduhang duwa:

Globe Osam (84) - Abasolo 20, Atillo 18, Gera 13, Bardillas 13, Villaver 9, Sabanat 6, Puyat 3, Casiño 2

Alliance Software (82) - Miñoza 28, Rizada 20, Lim 9, Bistorillo 8, Candia 5, Huerte 4, Quiampao 3, Maranan 2, Escarro 2, Demecillo 1  (BANAT)