CEBU - Gipaluhod og maayo sa Sacred Heart School-Jesuit (SHS-J) ang Saint Alphonsus Catholic School (SACS), 67-51 sa nagpadayong aksiyon sa Hapee Online Basketball League 2nd Challenge Cup didto sa Guadalupe Sports Complex sa brgy. Guadalupe, ning siyudad.
Hinuon, miagi pa og kalisud ang SHS-J una nila maangkon ang himaya sa kadaugan.
Sikit kaayo ang duwa sa unang duha ka kuwarter ug nagtabla pa gani ang iskor, 23-all paghuman sa first half.
Kalit nga mi-abante ang SHS-J dihang misiaw sila si Kyle Edwin Valmoria, Michael Smith, ug Grelan Tagaloguin nga mipatuasik sa ilang opensiba aron pag-angkon og 10 puntos nga bentaha sa ikatulong kuwarter.
Si Valmoria mibahog og 17 puntos aron pangulohan ang SHS-J. Si Valmoria mao sab ang giilang Durabend Batang Tibay player of the game.
Si Smith miabuno og 13 puntos ug si Tagaloguin misansan og 10 puntos alang sa maong kadaugan.
Sa pasiunang duwa, ang SACS nakaipsot gikan sa CIT Hoop It Up bitbit ang 37-36 nga kadaugan sa 12-under category.
Si Ryan Reynes maoy topscorer sa SACS pinaagi sa iyang 21 puntos. (BANAT NEWS)