UC di na kapugngan sa 13th Milo Little Olympics

CEBU- Dili na gyud mabangbang ang University of Cebu (UC) Webmasters ug seguradong malangkat ang ilang ika-13 nga overall title sa Milo Little Olympics didto sa Cebu City Sports Center.

Sa nahabiling usa ka adlaw sa kompetisyon, ang UC nakahipos na og 28 golds, 14 silvers ug siyam ka bronzes human maghari sa lima ka events sa nanghinapos nga kalihukan.

Ang athletics maoy labing daghang namina nga bulawan sa UC, diin mihakot kini og dugang lima ka gold medals sa katapusang adlaw sa kompetisyon.

Nanghawod ang UC sa 100m, 400m sprints, 5,000m run ug sa 4x100 ug 4x400 relays.

Si Paula Abigail Vega nahimong usa sa multiple gold medal winners sa UC pinaagi sa pagkabkab og upat ka individual medals sa swimming. Naghari siya sa 50m, 100m freestyle, 400m freestyle, 100m backstroke ug 400m individual medley.

Ang UC mikabkab sab og bulawan, duha ka silvers ug usa ka bronze sa badminton kortesiya nilang Mark Puentevella ug Joshua Ibo nga nag-unay alang sa single titles diin si Puentevella nidaog, 21-19, 21-8.

Sa laing bahin, ang University of San Carlos (USC) Warriors maoy mipahiluna alang sa ikaduhang dapit nga adunay 7-gold, 1-silver ug 4-bronze medal tally, gisundan sa University of Southern Philippines Foundation sa ilang 6-4-2 tally.

Sa elementary division, ang Sacred Heart School-Jesuit maoy nag-una sa ilang 6-6-4 tally, gisundan sa Silliman University sa ilang 6-2-1 tally, samtang ang ni-okupar sa ikatulo mao ang San Nicolas Elementary School sa ilang 5-5-5 tally. - Banat News