Binukbukay na sa Daytime Boxing

CEBU- Ibuhos na ang tanang abilidad ni ALA Boxing stalwart Michael Domingo (36-14-2, 15KOs) sa dihang modepensa kini sa iyang World Boxing Organization (WBO) Oriental bantamweight title batok ni kanhi world champion Ratanachai Sor Vorapin (73-10, 49KOs) sa Thailand sa main event sa gikahinaman nga "Daytime Boxing: Philippines vs. Thailand" showdown nga sugdan karong alas-9:00 sa buntag diha sa Cebu Coliseum.

Si Domingo, 29-anyos sa Libac, Sultan Kudarat manalipod sa labing unang higayon sa WBO regional belt nga iyang nalangkat pinaagi sa pagpaundang ni Indonesian Revo Rengkung sa ikaduhang hugna sa undercard sa "Laban Na Banal: Panahon Na" card niadtong Hulyo 27 diha gihapon sa Cebu Coliseum.

Sukad mikulit og daog batok sa kanhi way pildeng Mexican prospect nga si Miguel Roman atol sa Boxing World Cup niadtong Agosto 11, 2007 didto sa Sacramento, California, si Domingo miharos sa iyang duha ka duwa diin ang katapusan pinaagi sa second round stoppage ni Thai Tehpnimit Sor Chitpattana sa miaging Abril 6 didto sa Araneta Coliseum sa Quezon City.

Ning higayona, si Domingo gipaabot nga magsagubang na sab og lain nga pagsulay tungod kay lig-on kaayo si Vorapin ug may halapad na nga kasinatian sa pamuksing.

Si Vorapin naghari kaniadto sa WBO bantamweight, apan nahuboan sa iyang korona human mapilde ngadto ni Jhonny Gonzalez sa Mexico niadtong 2005. 

Atol sa iyang katapusang away niadtong Abril 6 didto sa Big Dome, gidabodabohan ug gipaundang siya ni reigning WBO 118-pound king Gerry Peñalosa sa ikawalong hugna.

Sa supporting main event, si   Joel de la Cruz makigsinukliay og kumo batok ni kanhi WBA champion Somsak Sithchatchawal sa Thailand.

Lain pang magbinukbukay sa maong boxing card naglakip ni Elmer Colve batok Amor Tino, Marvin Sonsona batok John Naimez, Julius Alcos batok Nelson Llanos ug female fighter nga si Geremie Tabastabas batok ni Usanakorn Kokietgym sa Thailand.

Ang “Daytime Boxing: Philippines versus Thailand” gipasiugdahan sa SGG Sports Promotions, Kokiet Group sa Thailand, Cebu City Government, Viva Sports, Tanduay, Omega Boxing Gym, Sunriser Motorcycles sa Norkis Group ug Cebu Grand Hotel.

Ang mga tiket mapalit sa P500 alang sa VIP/sponsor, P350 sa ringside, P250 sa lower box ug P100 alang sa upper box. - Banat News