Globe Osam,VECO Mimakmak sa kaatbang

CEBU - Gisubhan sa Globe Osam ug Visayan Electric Company (VECO) ang ilang managlahing kampanya alang sa titulo pinaagi sa pagpukan sa ilang tagsa-tagsa ka kaabtang sa 7th Thirsty Hoop Jams Basketball Tournament didto sa BRIGHT Academy gym sa brgy. Banilad, ning siyudad.

Si Nestor Badillas mibagdok og 32 puntos, samtang si Nestor Atillo mibugha og 19 puntos alang sa Globe kinsa midaog sa House of Hope, 96-88, samtang ang si Eric Espinosa misansan og 23 puntos nga mipakaging sa Alliance Software, 87-47.

Sila si Tommy Abasolo ug Albert Villaber miabuno og 18 puntos matag usa alang sa Globe Osam, kinsa miwadwad og maayo sa second half aron pagpukan sa House of Hope.

Laing nakakuha og double figures alang sa VECO mao sila si Arnulf Santos, kinsa miposte og 14 ug si Kent Alvarado nga miabuno og 10 puntos.

Sa laing mga duwa, ang Thirsty nakalingkawas pinaagi sa pagposte og 56-52 nga kadaugan batok sa Globe Telecom, ang Blumango Technologies naka-eskapo sa makuti nga kumbati batok sa NEC Telecom, 46-45 ug ang Icomm midaog lang og tres puntos batok sa Protrade, 55-52.

Sila si Stanley Mahinay ug Jade Ursal nagkumboya og 27 puntos alang sa Thirsty, samtang ang Blumango Technologies gipangulohan ni Francisco Matugas sa iyang 12 puntos, gisundan ni Mark Matidios sa iyang 10 puntos. Si Jeffrey Padernal mao sab ang nangulo sa Icomm pinaagi sa iyang 15 puntos ug si Filomeno Villaruel miligwat og 12 puntos. – Banat News