Vorapin nagsalig sa iyang kasinatian

CEBU - Lawom nga kasinatian maoy gisaligan ni kanhi World Boxing Organization (WBO) bantamweight champion Ratanachai Sor Vorapin.

Matud pa ni Vorapin ang kasinatian maoy dakung papel sa iyang away batok ni WBO Oriental bantamweight titlist Michael Domingo karong Domingo diha sa Cebu Coliseum.

Ang ranked WBO no. 3 nga si Vorapin moharong ni Domingo alang sa korona nga maoy main event sa gipaabot nga “Daytime Boxing: Philippines vs. Thailand” card nga sugdan sa alas-9:00 sa buntag ug makita kini live pinaagi sa satellite sa Thailand, Cambodia, Vietnam, Malaysia ug uban pang kasilinganang kanasoran.

Nasinati na ni Ratanachai ang estilo ni Domingo kay nakaaway man kini sa iyang stablemates nga sila si Somask ug Sod didto sa Thailand.

Si Domingo napilde sa duha ka away pinaagi sa knockout, apan angayang mangandam si Ratanachai gumikan kay lahi na ang Domingo nga iyang harungon karong Domingo sukad kini mipasilong sa landong sa nabantog nga ALA Gym.

Si Vorapin ug ang iyang team nidaog kagabii dinhi sa Sugbu ug milahos dayon kini ngadto sa Cebu Grand Hotel.

Lain pang magbinakbakay sa maong boxing card naglakip ni ex-WBA champ Somsak Sithchatchawal batok Joel de la Cruz, Elmer Colve batok Amor Tino, Marvin Sonsona batok John Naimez, Julius Alcos batok Nelson Llanos ug ang Pinay’ng boksidor nga si Geremie Tabastabas batok ni Usanakorn Kokietgym sa Thailand.

Ang “Daytime Boxing: Philippine versus Thailand” gipasiugdahan sa SGG Sports Promotions, Kokiet Group of Thailand, Cebu City Government, Viva Sports, Tanduay, Omega Boxing Gym, Sunriser Motorcycles sa Norkis Group of Companies ug Cebu Grand Hotel.

Gipahibalo sab ni promoter Sammy Gello-ani nga adunay pagahimuon nga press conference alang sa maong karong alas-3:00 sa hapon diha sa Cebu Grand Hotel.

Ang official weigh-in himuon ugma sa alas-9:00 sa buntag diha gihapon sa Cebu Grand Hotel.