Unilink Shipping milawig sa finals

CEBU - Gipakgang sa Unilink Shipping ang paborito nga Ave Maria Sanctuary Park, 99-85 aron pag-abante sa finals  sa Vic Enterprises Invitational Basketball League didto sa Cebu Eastern College (CEC) gym.

Gumikan niini, ang Unilink gikatakdang moharong sa Golden Lines alang sa tinaktakay nga kampiyonato nga gikatakda sunod semana.  

Mipabuhagay og daghang puntos ang Unilink sa fourth period aron pagkuha’g 78-61 nga labaw. Ilang gisugdan ang first period sa iskor 27-15, apan tungod sa hugot nga depensa sa Ave Maria nakasikit kini sa iskor nga 41-40 sa halftime.

Sa dihang nahutdan na og kusog ang Ave Maria sa fourth quarter gibanatan dayon kini sa Unilink aron pag-angkon og 15 puntos nga bentaha. Gikan niadto, wala na makarekober ang Ave Maria.

Si Ricky Labajo maoy nangulo sa Unilink sa iyang 29 puntos bisan ang laing tulo sa iyang kaubanan miposte og double figures. Si Aaron Pancho mibugha og 24 puntos, gisundan ni Martin Grogard sa iyang 19 puntos ug si Norwin Baclay miposa og 15 puntos.

Si Freddie Latosa mao sab ang nangu sa Ave Maria pinaagi sa iyang 32 puntos.

PUNTOS MATAG USA

Unilink (99) -- Labajo 29, Pancho 24, Grogard 19, Baclay 15, Caparas 6, E. Aniñon 6

Ave Maria (85) -- Latosa 32, Desuyo 18, Senining 16, Rodriguez 6, Estudillo 4, Pogoy 4, Rances 4, Salacut 2