John Videoke kampiyon na sab sa LLBA

CEBU - Ang John Videoke walay kukaluoy nga milubong sa mortal nga kaaway Tambuli, 80-65 aron paglangkat sa ikaduhang sunod-sunod nga korona sa Lapu-Lapu Basketball Association (LLBA) Fiesta Conference didto sa Datag Gym, dakbayan sa Lapu-Lapu.

Alang sa John Videoke, dili lalim ang ilang pagsulod sa tunukon nga dalan sa finals kay niagi pa kini og makuti nga kumbati ug gani hapit pa kini madiskuhido sa Yan C Rico sa semifinals.

Unang miratsada ang Tambuli pagsugod sa unang 10 minutos sa duwa, hinuon wala kini makalabaw og daku hinungdan nga yano kaayong nailog sa John Videoke ang labaw sa sunod nga kuwarter ug pinaagi sa paningkamot ni Cacai Versoza mitubo og maayo ang labaw sa ikatulong kuwarter.

Sa fourth, ang Tambuli sa kombinasyon nilang Boy Castueras ug Nelson Suico hinay-hinay nga mikitkit sa dakung labaw, apan napakyas kini kay sa katapusang tres minutos si Versoza mipatuasik sa iyang mga puntos aron pagsakmit sa korona.

Si Versoza kinsa maoy nangu sa John Videoke sa iyang 15 puntos maoy napiling “most valuable player” (MVP).

Samtang ang Jiboren naka-eskapo gikan sa mga kamot sa Yan C Rico bitbit ang 72-70 nga kadaugan sa kulbahinam nga duwa aron pag-angkon sa ikatulong dapit sa maong liga.

Ang undermanned nga Yan C Rico bisan og unom lang ka players ang mitunga sa pagsugod sa duwa nakahimo gihapon sa pagdominar sa duwa ug ilang gitapos ang first half sa iskor nga 12 puntos.

Sa pagsugod sa 3rd quarter gipahamtangan og 10 puntos nga deduction ang Yan C Rico tungod kay kulang og players. Bisan pa niini, ang Yan C Rico pabilin gihapon naglabaw ug ilang gitangkil ang tres puntos nga labaw sa fourth quarter. Sa kalit nakuha sa Jiboren ang momentum og mao na ang nilabaw.

Nagtabla ang duha, 70-all kortesiya sa duha ka free throws ni Alan Sepe sa himalatyong oras sa duwa nga nakapahugyaw sa duwa. Apan sa katapusang uno minuto, si Giope Guevarra mibuhi sa iyang marka-bahala nga itsa ug sa wala damha nasulod kini dungan sa pagtingog sa buzzer nga nakapadaog sa Jiboren.

Ang LLBA Fiesta Conference gipaluyohan sab sa Harumi Sports ni Fernando Cinco.

PUNTOS MATAG USA

Unang duwa:

(3rd place)

JIBOREN (72) -- Gomez 14, Velasquez 8, Nadado 7, Cabasa 7, Guevarra 7, Celiz 6, Alvis 6, Dela Peña 5, Gungob 4, Surigao 4, Tampus 4, Berezo 2

YAN C RICO (70) -- Cuadra 20, Sepe 15, Patalinghug 9, Inot 7, Palad 6, Pardillo 6, Simbajon 4, Pader 3

Ikaduhang duwa:

(championship)

JOHN VIDEOKE (80) -- Versoza 15, E. Gomos 10, R. Gomos 10, Macasero 9, Patalinghug 8, Dalos 6, Paquibot 5, Acuña 4, Amistad 4, Llenes 4, Arces 3, Aying 2

TAMBULI (65) -- Ybañez 12, Portugalisa 11, Nguho 7, Cosep 7, Ompad 7, Suico 6, Lapoja 6, Fuentes 3, Lumacad 3, Castueras 3