CEBU - Naghinam-hinam nang moduwa ang labing bag-ong basketball team franchise Oklahoma City Thunders sa 2008-2009 season sa National Basketball Association (NBA).
Ang Thunders mao ang koponan nga gihulip human gibungkag ang karaang Seattle Supersonics.
Ang batan-ong koponan pangulohan sa Rookie of the Year awardee sa miaging season nga si Kevin Durant kinsa mao karon ang gihugonhugonan nga mamahimong star player sa maong team.
Si Durant, 6-foot-9 nga guwardiya gikan sa University of Texas, mo-average og 20.3 puntos, 4.3 ka rebounds ug 2.4 assists sa miaging 2007-2008 season uban sa Supersonics. Makauban ni Durant sa team mao ang beteranong si Chris Wilcox, Francisco Elson, Joe Smith, Donyell Marshall ug point guard Earl Watson. Mokompleto sa line-up sa Thunders mao sila si Nick Collison, Ronald Dupree, De Von Hardin, Damien Wilkins ug ang high-flyer nga si Desmond Mason kinsa ilang nakuha bugti sa kanhi nilang guwardiya nga si Luke Ridnour ug Adrian Griffin.
Ang general manager sa Thunders nga si Sam Presti mikuha sab sa serbisyo sa beteranong coach sa NBA nga si P.J Carlesimo aron maoy mogiya sa koponan. Si Carlesimo, kanhi assistant coach ni Greg Popovich sa San Antonio Spurs sa wala pa siya mitapon sa Portland Trail Blazers ug sa Supersonics. - BANAT