Barangay Lamac mirehistro doble nga kadaugan

CEBU -Gisugdan sa Brgy. Lamac ang ilang kampanya sa kampiyonato pinaagi sa pagkulit og dobleng kadaugan sa pagsugod sa 2008 Consolacion Fiesta Cup Basketball Tournament didto sa Consolacion Sports Complex.

Ang Brgy. Lamac milubong sa Danlag, 48-28 sa Sangguniang Kabataan (SK) division, samtang ang ilang igsuong koponan niagi pa og lisud nga kumbati una nila maangkon ang 54-51 nga kadaugan batok sa Jugan sa Inter-barangay category.

Sa kumbati sa SK, ang Lamac milabaw lang og uno punto, 9-8 sa unang 10 minutos sa duwa, apan igo lang nila gipa-iskor og dos puntos ang   Danlag sa sunod nga kuwarter batok sa ilang nahimo nga 20 puntos aron pagbingat sa labaw ngadto sa 19 puntos sa halftime.

Gipalawman pa sa Lamac ang lubong sa nagtiyabaw nga Danlag ngadto na sa 31 puntos paghuman sa third period, 45-14. Nakan-an hinuon ang tagaliog nga labaw dihang ang Danlag milusad og 14-3 run, apan wala kini makahulga sa gitinguhang kadaugan sa Lamac.

Gipasiugdahan ni Paul Alelu Q. Flores, ang kanhi Far East University (FEU) Tamaraws sa UAAP ug Aurelio Eslawan Jr., ang duha ka bulan nga liga hugtanon sab nga gipaluyohan sa municipal government sa Consolacion ubos sa liderato ni Mayor Avelino Gungob Sr. ug Vice Mayor Ember B. Alinsug.

Puntos Matag Usa

(SK Division)

LAMAC (48) -- Gonzaga 11, Presbitero 11, Arenilla 10, Artizuela 6, Lopez 2, Dayday 2, Cabigas 2, Buro 2, Macapaz 2

DANLAG (28) -- Antopina 11, Nahuman 5, Linao 4, Ceniza 4

 (Inter-Barangay)

LAMAC (54) -- Espinosa 19, Dayday 13, Sungahid 8, Sapio 4, Palis 4, Mendoza 4, Repedro 2

JUGAN (51) -- Daghil 12, Villamor 10, Pilapil 10, Dumadag 8, Ygot 6, Lazarte 2, Agujar 2, Pilapil 1 - BANAT