Toyota-Otis abante sa CEPBA finals

Mibawos ang Toyota-Otis ngadto sa Hotel Fortuna pinaagi sa
pag-iskor og 97-86 nga kadaugan aron pagsakmit sa katapusang luna sa finals sa Cebu Professionals Basketball Association (CEPBA) 1st President Emeritus Ernesto Elizondo Cup niadtong Domingo didto sa YMCA gym.

Harungon sa Toyota-Otis sa kampiyonato mao ang Cebu Integrated Arrastre (CIA), kinsa unang milangkat og luna sa finals human gipilde ang Yayoy's Grill, 80-69 pinaagi sa pagpangulo ni Dr. Dennis Villamor.

Nagmangtas si Jingjing Gacayan diin mipabuhagay kini'g 15 puntos sud lang sa unang hugna ug nakapasulod sab kini og tulo ka triples.

Sikit kaayo ang duwa gikan pagsugod tungod kay natapos ang first period sa iskor nga 27-all ug nagtabla sab ang duha sa halftime, 46-all.

Si Gacayan maoy nangulo sa Toyota-Otis sa iyang 34 puntos, samtang si Boy Alfeche mitampo og 31 puntos lakip na niini ang 10 puntos sa third period.

Si Jojo Lozano, kinsa wala ka-iskor sa tibuok first quarter maoy nangulo sa Hotel Fortuna pinaagi sa iyang 25 puntos, samtang si Mario Naron miamot og 24 puntos.

Gitapos sa Toyota-Otis ang double round eliminations pinaagi sa ilang 5-1 nga baraha, samtang ang CIA naghupot og 4-2 nga baraha. 
Ang awarding ceremonies himuon karong Septiyembre 21 atol sa ilang ika-36 nga anibersaryo diha sa Olympic Hall sa Baseline Restaurant.

Natukod ang CEPBA niadtong tuig 1972 pinaagi sa paningkamot ni kanhi Cebu City South District councilor Ernesto Elizondo.

Usa ka dakung tropeyo ang madawat sa kampiyon kortesiya ni Presidente Gloria Macapagal-Arroyo. Laing tropeyo ang ihatag sa mamahimong MVP ug ingon man mga medalya alang sa individual awardees. 

Toyota-Otis (97) -- Gacayan 34, Alfeche 31, Maquilan 8, Roldan 7, Sayson 7, Ybañez 6, Pacaldo 4
Hotel Fortuna (86) -- Lozano 25, Naron 24, Tolentino 18, Manatad 11, Diaz 5, Santiago 3 - BANAT