Devance ipinamigay ng Rain Or Shine sa Alaska

Sa pagnanais na baguhin ang kanilang koponan, sumuong sa isang malaking three-player trade ang Rain or Shine isang araw mata-pos tanghalin si Fil-American forward Gabe Norwood bilang top overall pick ng katatapos na 2008 Rookie Draft.

Dinala ng Elasto Painters si 2007 PBA No. 1 overall pick Joe Devance sa Alaska Aces kasama ang dalawang second round picks nito sa susunod na taon para masambot sina Fil-Am guard Solomon Mercado at ang five year veteran forward na si Eddie Laure.

“The players we got from the Draft and the addition of Mercado would add quickness to our team,” ani Rain or Shine co-team owner Raymund Yu sa pagpili nila kina Norwood at TY Tang ng La Salle sa 2008 PBA Rookie Draft. “Although we lost Joe (Devance), we got an experienced player in Eddie (Laure)”.

Ang 6’2 na si Laure, produkto ng Adamson University at naglaro na sa Shell, ay miyembro ng tropa ng Welcoat na naghari sa 2002 PBL Challenge Cup katuwang si Romel Adducul.

Itinuring naman ni coach Tim Cone na isang ‘sugal’ ang pagbibigay nila kay Mercado, nakatulong ni Tang sa pagdadala sa Harbour Centre sa huling dalawang PBL finals kontra sa Hapee Toothpaste ni Norwood, sa Elasto Painters.

“It’s a gamble. Mercado will be a great player without a doubt,” ani Cone sa pagpapakawala nila kina Mercado at Laure. “We’re lucky it slipped to us. But Devance fills an immediate need for us at the four position. We’ll miss Eddie, but he’ll be able to play a big role with Welcoat.” 

Gusto sana ni Cone na si Mercado, nanggaling sa Biola University sa United States, ang sumalo sa posibleng maiiwang tra-baho ng beteranong si Jeffrey Cariaso sa Aces.

“We have been looking for a guard that can play behind Jeffrey and take over Jeffrey’s place eventually,” wika ni Cone kay Mercado. 

Nagposte naman ang 6’7 na si Devance ng mga averages na 13.6 puntos at 6.5 rebounds para sa Welcoat sa kanyang unang taon bilang rookie bago nagkaroon ng injury sa nakaraang 2008 PBA Philippine Cup.