Atan Guardo mikulit og daog

Tulo ka magduduwa sa Atan Guardo ang mibahog og kapin sa 20 puntos aron ihatod ang ilang koponan ngadto sa 101-96 nga kadaugan batok sa John Roy sa 2008 Basketball Association of Ramos (BAR) tournament didto sa Cogon-Ramos Gym sa dalan F. Ramos, ning siyudad.

Si Reynolds Zamora mi-ariya og 26 puntos, si Raul Endab miabuno og 23 puntos ug si Bebot Dysam mikandos og 21 puntos.

Bisan gibiyaan og singko puntos sa unang kuwarter, 40-45, ang Atan Guardo padayong mirumbo sa John Roy hangtod nga nailog nila ang labaw, 64-63 paghuman sa halftime.

Sukad niadto, wala na kapugngi ang nagdilaab nga kainit sa Atan Guardo ug mao na ang nikontrolar sa duwa. Ilang gitak-op ang ikatulong kuwarter sa iskor nga 81-74. Bugtong konsuylo sa John Roy mao ang pagkitkit sa labaw ngadto sa singko puntos paghuman sa duwa.

Ang Atan Guardo ni sports patron Jonathan ‘Atan’ Guardo gipaluyohan sa Uniherb Philippines, usa sa nag-unang health companies dinhi sa nasud nga nag-apod-apod sa nabantog nga food supplements sama sa Arthro, Heartvit, Kidneycare ug Diabet.

Atan Guardo (101) - Zamora 26, Endab 23, Dysam 21, Sabay 10, Rama 9, De la Cruz 7, Castro 5

John Roy (96) - Llanos 30, Bantolinao 20, Empleo 13, Cabase 7, Bensoy 6, Damole 6, Calunod 5, Penas 4, Briones 2