Wala mag-usik og panahon ang Mehikanong si Eden 'Anestesista' Marquez ug mideklara dayon kini og gubat batok sa Bol-anong boksidor Rey 'Boom-Boom' Bautista atol sa iyang pag-abot kagahapon sa buntag.
"I have very good chance and I believe I will knock him out," hait nga tubag ni Marquez dihang gipangutana ni ALA Promotions marketing director Chad Cañares kalabot sa iyang away batok ni Bautista.
Ang maong pamahayag gipalanog sa manedyer ni Marquez nga si Fernando Dominguez, kinsa miuban aron mo-agak sa iyang boksidor uban sa iyang beteranong trainer nga si Edmundo Gaytan.
“I know how Bautista fights. He fought a hard fight against my other boxer, Antonio Meza. Marquez is better and is stronger than Meza. I am sure the fight will not last the distance,” matud pa ni Dominguez, kinsa maoy nagkupot og mga world-class fighters sa Mexico.
Sa laing bahin, ang local fight fans makakita sa mga labok ni Marquez dihang mopakita kini sa iyang abilidad diha sa ALA Gym Fight Club sa Banilad Town Center ugma sa alas-5:00 sa hapon uban sa Nicaraguan challenger nga si Eddy Castro, kinsa makigharong batok ni world-champion Donnie Nietes sa mao gihapon nga card.
Si Bautista mohimo sa iyang ikaduhang pagdepensa sa iyang World Boxing Organization (WBO) Intercontinental title batok ni Marquez, samtang si Nietes modepensa sa labing unang higayon sa iyang WBO minimumweight title batok ni Castro sa gikahinaman nga "WBO Night of Champions" card karong Sabado diha sa Pacific grand ballroom sa Waterfront-Cebu City Hotel and Casino sa Lahug, ning siyudad.
Ang mga tiket mapalit sa ALA Promotions Office, ALA Gym Banilad Town Center ug Shang Mactan Town Center, Islands Souvenirs, Bisaya Espisyal, USA Sports boutiques sa Ayala ug Marfori Bakeshop sa Mandaue.
Ang majors sponsors naglakip sa Lai Garden Restaurant-SM City, VECO, KIA Motors, Hola España, Chika-an sa Cebu, SM City Cebu, Gaisano Grand, La Tegola Cucina Italiana, The Freeman, Cebu Daily News, SunStar, Y101 Always First, Sunriser Motorcycles ug Media Images and Production Concepts.