Dose ka teams ang gilaumang mosalmot sa ipahigayong Punta Princesa Sports Association (PPSA) Businessmen’s Cup 2008 Open nga sugdan karong Domingo diha sa Vicente Sotto Memorial gym sa barangay Punta Princesa, ning siyudad.
Ang mga teams nga sayong miduso sa ilang mga line-ups mao ang Flora Large Format ni Allan Lim, Black Arrow Security Agency ni ex-Cobra Ahmed Lozano, Julie's Bakeshop, Cathwin, BIAR, RCAF, Triple B ug Amihan nga gipangulohan ni Romy Rama.
Usa sa mohatag og kasadya sa pagbukas sa torneyo mao ang exhibition game tali sa PPSA All-Star batok sa Rama Boys nga pangulohan ni triggerman Jingjing Rama.
Ang PPSA tournament gipasiugdahan sa ilang club president Douglas Beltran ubos sa pag-abag nila ni Boboy Rosito ug Allan Lim alang sa physical fitness ug camaraderie tali sa mga basketball fanatics nga nagpuyo sa mga lain-laing villages/subdivisions ug uban pang mga kapunongan sa sports nga nagpalibot diha sa barangay Punta Princesa.
Si Cebu City Vice Mayor Michael Rama kinsa hilig sab sa duwang basketbol mohatag og pakigpulong atol sa pagbukas sa torneyo.
Lain pang mohatag og lamas sa torneyo mao ang pagpili sa “Ms. PPSA 2008” ug ang pagpili sa best uniform.