Ang mga hurado sa Greco-Roman wrestling event didto sa Beijing Olympics nagkanayon nga may katarungan ang usa ka Swedish wrestler nga masuko ug mi-protesta sa iyang nadawat nga bronze medal.
Ang Swedish wrestler nga si Ara Abrahamian, 28 anyos, milambus sa iyang medalya sa salug atol sa awarding ceremony isip pag-protesta sa iyang nadawat nga medalya dihang napilde siya sa Italyano nga si Andrea Minguzzi nga maoy midaug sa gold medal sa 84 kgs. wrestling event.
Mi-reklamo si Abrahamian ngadto sa Court of Arbitration for Sport (CAS) atol sa ilang sangka ni Mu\inguzzi kaniadtong Agosto 14 tungod sa usa ka penalty nga nahimo sa Italyano sa second round apan wala kini paminawa sa referee.
Laing nasuk-an ni Abrahamian dihang gidid-an pa gyud ang iyang coach sa pagpa-review sa video ug ang International Federation of Associated Wrestling Style o FILA, midumili sa maong protesta.
Samtang husto ug may katarungan si Abrahamian nga masuko, kini maoy sayop.
Usa ka taekwondo jins sa Cuba nga si Angel Valodia Matos ang nag-atubang karon og ban for life human iyang gitukmod ug gipatiran sa ulo ang referee dihang na-disqualify siya sa iyang sangka alang sa bronze medal batok ni Arman Chilmanov sa Kazakhstan.
Nag-una si Matos, 3-2 may 1:02 sa second round apan nahapla human maigo sa tindak ni Chilmanov.
Gihukman siya nga ma-disqualify tungod sa gidugayan sa pagpa-abot og medical attention nga milapas na og usa ka minuto kay usa lang ka minuto ang tagal sa injury timeout. Gitukmod ni Matos ang referee nga si Chakir Chelbat sa Sweden kay matod pa nga subra-an ra ka estrikto ang referee ug mipabor ngadto sa Kazakhstan tungod kay gitanyagan kini’g salapi.
Si Matos wala magmahay ug wala mangayo’g pasaylo.
Lakip ang Koreano nga coach ni Matos nga si Yang Jin-suk ilakip sa rekumendasyon sa pag-ban gikan sa World Taekwondo Federation.