USA “ Redeem Team” milangkat sa gold medal

Milampos ang Team USA sa paglangkat sa bulawang medalya sa men’s basketball event sa naghinapos nga 2008 Beijing Olympics dihang ilang gibuntog ang Spain sa iskor nga 118-107 niadtong miaging adlaw didto sa Beijing Indoor Basketball Gymnasium, China.

Si Dwayne Wade mipugnit og 21 sa iyang 27 puntos sa first half aron masakmit sa USA ang labaw sa dayong tapos sa second quarter, 69-61. Ang star player sa Miami Heat nga si Wade mipatusak sa iyang upat sa pito niya ka three-point attempts aron pangulohan ang init nga opensa sa USA. Laing mipuntos sa USA mao si Kobe Bryant nga midiga og 20 puntos uban ang unom ka assists ug duha ka rebounds.

Ang Team USA uwahing nakaangkon sa Gold Medal niadtong 2000 apan pakyas kini sa nisunod nga 2004 Athens Olympic diin igo lang kining nakahipos og Bronze Medal. Tungod sa maong kadaugan ang Team USA nipamatuod sa tibuok kalibutan nga sila ang hari sa basketball.

Sa laing bahin, ang pilderong Spain nga pakyas sa pagsakmit sa labing una unta nilang Gold Medal sa natad sa basketball gipangulohan sa forward nga si Rudy Fernandez nga miposte og 22 puntos, gisundan siya sa team mate ni Bryant sa Los Angeles Lakers nga si Pau Gasol nga mipuga og 21 puntos samtang si Juan Carlos Navarro midunol og 18 puntos alang sa mga Kastila.