Sama sa daan nang gitagna, gilampaso sa University of the Visayas(UV) Green Lancers ang Cebu Institute of Technology (CIT) Wildcats sa iskor nga 83-63, sa nagpadayon nga duwa sa Cebu Schools Athletic Foundation, Inc. (CESAFI), didto sa Cebu Coliseum. Unang nakalabaw ang Wildcats dihang mipauwan sila’g sasunson nga three-point baskets, 15-14 sa first period ug sa second period, nakalabaw na usan ang Wildcats, 38-33 nga maoy ilang labing daku nga abante. Sa dihang nabawi sa Lancers ang labaw, 39-38, wala na mapugngi ang Lancers ilabi kay wala’y nakadepensa ug maayo kang Gregory Slaughter kinsa maoy nangu sa Lancers sa iyang 20 puntos. Igo lang mokapyot sa iyang bukton ang Wildcats nga nagdepensa kaniya.
Gawas pa sa iyang puntos, gilupig tanan ni Slaughter ang iyang mga kaatbang sa Wildcats sa rebound department.
Tungod kay daku naman sila’g abante, wala na gamita si Slaughter sa kataposang unom ka minutos ug maayo sab nakaduwa ang uban niyang mga teammates. 13 puntos samtang si Edrian Lao, may 11 puntos alang sa Lancers.
Ang Wildcats gipangulohan ni Sherwin Resilla sa iyang 29 puntos samtang si Ronel Villarba may 13 puntos ug si RJ Reyes may 10 puntos.
Ang maong kadaugan naghatag sa Lancers ug 5-1 nga baraha samtang ang Wildcats, wala pa gihapo’y daug ug aduna nay 0-4 nga baraha.
Sa high school matches, midaug ang defending champion UV Baby Lancers batok sa University of Southern Philippines Foundation (USPF) Baby Panthers sa iskor, 95-75 samtang nakatilaw na gyud ug unang daug ang University of San Carlos (USC) Baby Warriors batok sa Cebu Eastern College (CEC) Dragons sa iskor, 97-60.