Mikulit og milagro si Erik Martelino dihang mipasulod kini og tres puntos sa nahabiling kuwatro segundos aron madagit sa Day-as Cockers ang kadaugan batok sa Carreta Lauron sa iskor nga 65-63 sa miaging gabii sa nagpadayong 1st Mary Ann delos Santos Inter-Urban Basketball Tournament didto sa Carreta Sports Complex, ning siyudad.
Sa sayong bahin, miwadwad ang Carreta hinungdan gibiyaan og syete puntos ang Cockers sa iskor nga 19-12, kontrolado sa Carreta ang hangtod na sa 2nd quarter ug gitapos nila ang first half sa kuwatro puntos nga labaw.
Padayong nagkagidlay ang Day-as Cockers sa ikatulong kuwarter apan wala kini mahubsi sa ilang paglaum ug mi-adjust sa ilang depensa ug opensiba.
Wala damha sa Carreta ang gihimong adjustment nakaapekto sa ilang momentum ug inanay nga nabawi sa Day-as ang tempo sa duwa hangtod nga sila nagbawsanay og pamuntos.
Sa sayong bahin sa katapusang kuwarter nagsinukliay og mga puntos ang duha ka koponan hinungdan nga maoy nakaingon sa mainitong engkwentro ug nakapahugyaw sa mga dumadapig sa isig ka habig.
Sa nahabiling upat ka segundos sa last quarter labaw nalang og duha ka puntos ang Lauron apan sa usa ka pamilok mibuhi si Martelino og tres puntos nga nakapaukyab sa mga dumadapig ug sa mga players.
Ang Day-as Cockers ug Carreta Lauron parehong naghupot sa barahang 3-1 win-lose record.
Ang 1st Mary Ann delos Santos Inter-Urban Basketball Tournament gipasiugdahan ni Lahug brgy. Capt. Mary Ann delos Santos ubos sa abag sa league director nga si Andrew Biton.
Puntos Matag Usa
DAY-AS COCKERS (65) E. Martelino 29, J. Beldoro 11, D. Maglinte 6, J. Bughao 6, J. Tura 5, A. Flores 3, J. Caballes 3, J. Entera 2.
CARRETA LAURON (63) U. Tigbas 20, N. Flordeliz 14, J. Echavaria 13, J. Inot 6, L. Navarosa 4, A. Zabala 3, M. Lauron 3.
Quarterscores: 12-19, 30-34, 45-49, 65-63