Pakyas na sab ang Pilipinas sa atong damgo nga molabni og gold medal sa Olympics dihang napukan ang atong pambato sa taekwondo nga si Tshomlee Go batok ni Ryan Carneli sa Australia, 0-1 didto sa Beijing.
Ang sangka nila ni Go ug Carneli gipahigayon kagahapon sa round one (match 5) diin na-menosan pa gani’g usa ka punto ang 22 anyos nga Aussie nga modaug unta sa iskor, 4-0.
Sa kapakyasan ni Go, usa na lang ang nagpabilin nga maoy makakuha’g medalya ug siya mao si Antoniette Rivero nga mo-away ugmang adlawa.
Ang 27 anyos ug 5-9 nga si Go, mi-away sa men’s flyweight division (under 58 kgs.) Ang tanang 14 ka sakop sa RP Team, gawas lang kang Rivero, nag-anam anam na kalagas didto sa Beijing lakip na si Harry Tañanor, ang bugtong boksidor nga maoy gipadala didto sa Beijing diin siya ang gilauman nga labing kusog nga contender alang sa gold medal. Sa una niyang away batok kang Manyol Plange sa Ghana, pakyas sab si Tañamor sa iskor, 0-3.
Ang unang natagak mao ang shooter nga si Eric Ang, ang ikaduha mao ang archer nga si Mark Javier ug ang ikatulo mao ang swimmer nga si Mike Molina. Wala’y bisan usa nila nga mi-abante alang sa medal round ug pakyas na sab ang Pilipinas nga matod pa adto na lang mobawi sa 2012 London Olympics.