Nakalinggawas ang FCO sa ilang hugot nga kumbati pinaagi sa pagpukan sa Fatima 57-56 aron paglangkat sa kadaugan niadtong miaging gabii sa nagpadayong T–Padilla First Basketball Tournament 2008, mini-division didto sa Kiwanes Sports Complex, ning siyudad.
Unang nakabentaha ang FCO ug mipahimulos sa 10 puntos nga labaw sa iskor 18-8 sa unang kuwarter. Apan ang labaw niini sa unang kuwarter gi-anam-anam og kitkit sa Fatima hinungdan sa pagkuyos sa labaw ngadto sa dos puntos nga bentaha sa iskor 26-24 pagkahuman sa first half.
Naglami ang duwa sa second half dihang midiskarte ang tagsa-tagsa ka koponan ug miduslit sa ilang mga depensa nga maoy hinungdan sa pagkahugyaw sa fans nga misaksi.
Misamot og kainit ang duwa sa ikatulong kuwarter dihang nagsinukliay na kini og mga puntos hangtod nailog pagbalik sa FCO ang labaw nga gihuptan sa Fatima ug mao na ang mikontrolar sa duwa sa iskor nga 43-38.
Sa katapusang bahin sa duwa, kondisyon ug determinado kaayo ang FCO tungod kay nabawi niini ang bentaha sa Fatima ug nagsugod na’g panday og pundasyon hangtod sa katapusang gutlo sa maong engkwentro.
Sa laing bahin, sa Junior’s division giwatas-watas sa LPC ang HPO ug milandig kini sa siyete puntos nga bentaha sa iskor 90-83.
Ang T – Padilla First Basketball Tournament 2008 gipasiugdahan sa Sangguniang Kabataan (SK) council gipanguluhan ni Jason Rosafa ug uban sa abag sa T-Padilla Barangay Council ubos sa liderato ni Brgy. Capt. Michael Ralota.
PUNTOS MATAG USA
FCO (57)J. Ababon 12, B. Dayangco 12, B. Tindoy 12, A. Aureo 8, P. Bacalla 4, J. Aracan 3, Capuyan Gerald 2, J. Navarro 2, K. Carcedo 2.
FATIMA (56) J. Peliño 29, Y. Orillaneda 14, J.F. Ricarte 5, R. Origedes 4, I. Deo 2, G. Desto 2.