Hangad ng defending champion San Beda College ang katatagan sa ikatlong puwesto sa pakikipag-sagupa sa University of Perpetual Help Dalta System sa pagpapatuloy ng second round ng 84th NCAA men’s basketball tournament sa Cuneta Astrodome sa Pasay City.
Sa taglay na 6-3 record, nakabuntot ang Red Lions sa likod ng nangunguna na ngayong Jose Rizal University na may 8-2 kartada tampok ang eight-game winning streak matapos agawin ang liderato sa Letran College na bumagsak sa ikalawang puwesto bunga ng 7-2 kartada.
Kasalukuyan namang nasa ilalim ng team standings ang Perpetual Altas na may isang panalo pa lamang sa 10-laro kaya kailangan nilang ipanalo ang mga natitira nilang games para magkaroon ng pag-asa sa Final Four.
Hangad ng Bedans na makabawi sa 48-53 pagkatalo sa Mapua Institute of Technology. Ngunit mas masagwa ang huling pagkatalo ng Perpetual na nalimitahan sa kabuuang 36-puntos lamang ng San Sebastian sa kanilang 68-36 pagkatalo.
Mauuna rito, magsasagupa ang Perpetual Altalletes at SBC Red Cubs sa alas-11:30 ng umaga sa juniors division. (MBalbuena)