Go, Rivero mulangkat og medalya alang sa Pilipinas sa Taekwondo

Plano karon sa duha ka Pinoy taekwondo player nga mulangkat og bulawang medalya sa nagpadayong Beijing Olympics human napakyas si Harry Tańamor sa iyang tuyo nga labnihon ang gold medal sa boxing dihang gipukan siya sa taga Ghana nga si Manyo Plange pinaagi sa 6-3 nga iskor sa dayong tapos sa ilang duwa niadtong Agosto 13.

Ang duha ka mangtas nga atleta sa Pilipinas nga musakbang alang sa natad sa taekwondo mao sila si Tshomee Go ug Mary Antoinette Rivero kinsa miabot sa Beijing International Airport Terminal kagahapon sa kaadlawon kauban ang duha nila ka coach nga sila si Kim Hong Sik ug Raul Samson.

Si Go unang makig-engkwentro karong Miyerkules alang sa 59 kg. division samtang mu-away usab karong Huwebes ang beteranong atleta nga si Rivero alang sa 67 kg didto sa University of Science and Technology Beijing Gymnasium.

“ I understand the pressure. I’m so excited and ready to compete. This is it. I’m here to enjoy myself,” matud ni Rivero.

Samtang si Go sa iyang bahin mibutyag nga misamot og kabug-at ang ilang gipas-ang pressure dihang napildi si Tańamor nga mao unta ang bugtong gilaumang makakuha og medalya.

“We’re ready, we did some light training in Manila, and we are coming here with a very high confidence. We’re focused on winning a medal,” matud pa ni Go.

Gidugang usab ni Go nga iyang ipagawas ang tanan niyang puwersa aron maka-ani’g medalya ug makatunol og kadungganan sa nasod nga wala pa makakuha og medalya sa nagpadayong Olympics.

Si Go sa iyang bahin nangayo og suporta sa mga Pilipino aron madugangan ang iyang kusug aron mulampos sa iyang tuyo ug tumong.

“Our aim is to win a medal, that’s what we came here for, and we hope to achieve it with the prayers of the Filipino people,” matud pa ni Rivero.

Samtang si Philippine Olympic Committee official Joey Romansanta mitug-an nga sila si Go ug Rivero naa sa tarong nga porma og malaumon siyang makakuha gyud kini og medalya.

“We are looking forward to a competitive performance here,” matud ni Romansanta.

Ang taekwondo manukad sa preliminary round ug mutapos sa medal round sa samang adlaw samtang angmakapupo og lima ka daog maoy muangkon sa gold medal.