Ang kusug nga bul-og sa depensa nga gipabaha sa Paradise Back-Country Club Anagan (PBA) maoy nahimong ganghaan aron hingpit niining maangkon ang korona batok sa Panagdait-A atol sa ilang engkwentro niadtong miaging gabii sa gipahigayong kampiyonato sa SK Barangay Kasambagan Sports Tournament 2008 Senior’s Division didto sa Vitaliano M. Colina Sports Complex, Kasambagan ning siyuadad.
Si Christian Ventura kinsa mihipos og 10 puntos sud lang sa unang kuwarter maoy nagtuboy sa PBA hinungdan nga miabante kini og nuebe puntos nga labaw batok sa Panagdait-A sa iskor 24-15 samtang sa ikaduhang kuwarter nagbaguod gihapon ang Panagdait-A dihang gipaburot og samot sa PBA ang ilang iskor ug miinat kini ngadto sa 13 puntos nga labaw sa iskor 49-36 pagkahuman sa first half.
Nag-aginod ang iskor nga gipasulod sa PBA sa unang duha ka kuwarter apan mi-asdang kini sa ilang nagpungasi nga depensa ug opensiba sa ikatulong kuwarter hinungdan nga diriyot maapsan ang PBA sa iskor 60-61.
Nahimong kulbahinam ang engkwentro sa katapusang kuwarter dihang nagsinukliay og mga puntos ang duha ka koponan dungan ang pagbuga sa ilang hugot nga depensa.
Midiskarte usab si Joel Aniñon sa sayong bahin sa ika-upat nga kuwarter ug ang gi-basket niining dos puntos maoy miilog sa labaw sa PBA sa iskor 64-63.
Ang paglabaw sa Panagdait-A nahimong hulga sa PBA apan walay kukahadlok nga gibanatan sa PBA ang Panagdait-A hinungdan nga misutoy kini ngadto sa tam-is nga luna sa kadaugan.
Samtang si King Velasquez usab ang napasidunggan isip MVP player kinsa mipakita sa iyang kabangis ug ka-agresibo sukad sa pagsugod sa liga.
Nahimong pundasyon sa PBA si Velasquez kinsa mitunol og 28 puntos uban sa tabang nila ni Warren Alfeche ug Ventura kinsa nagkumbuya sa 43 puntos samtang nangulo sa naparot nga Panagdait-A si Aniñon kinsa mihulma og 19 puntos ug abag ni Henry Mancera kinsa miamot og 11 puntos.
Ang Barangay Kasambagan SK Sports Tournament 2008 gipasiugdahan sa Sangguniang Kabataan gipanguluhan ni Hon. Erica Daag uban sa abag sa barangay council ubos sa liderato ni Brgy. Capt. Jose “Jun” Lim ug suporta ni konsehal Allan Daag, ang chairman sa committee on Sports.
Puntos Matag Usa
PBA (87) K. Velasquez 28, W. Alfeche 23, C. Ventura 20, Iway 8, Bontuyan 6, Pio 4.
Panagdait –A (71) . Aniñon 19, H. Mancera 11, Codilla 11, Sacil 8, Batiancila 8, Miñoza 6, Pepito 5, Dinulan 3.
Quarterscores
24-15, 49-35, 61-60, 87-71