Air21 Express 3-2 na kontra Ginebra

Nagkinahanglan nalang og usa ka daug ang Air21 Express arun malangkat ang labing una nilang kampiyonato dihang ilang gipatapsingan ang Barangay Ginebra Kings sa iskor nga 76-73 sa Game-5 sa ilang “best-of-seven” series gabii sa nagkainit nga  2008 Smart-PBA Fiesta Conference didto sa Cuneta Astrodome , Pasay City.

Ang Express mipukan sa Gin Kings sa usa ka kulbahinam nga away , si Arwind Santos miposte og 12 puntos lakip na niini ang game winning lay-up sa nahibiling 45 segundos sa final round arun sakmiton ang labaw. Tungod sa lig-on usab nga depensa ni Santos , ang star-player sa Gin Kings nga si Mark Caguioa igo lang mihipos og 7 puntos. Si Gary David ug si Steven Thomas maoy nangulo sa Express pinaagi sa ilang 15 puntos matag usa. Samtang ang sinaligang gwardiya sa Express nga si Wynne Arboleda na fouled-out sa nahibiling 1:22 minutos sa fourth quarter igo lang nakatigom og dos puntos.

Ang pilderong Gin Kings gipangulohan sa ilang import nga si Chris Alexander sa iyang 21 puntos , samtang si Eric Menk mipuga og 11 puntos uban ang pito ka rebounds, laing mibahug alang sa Kings ma si Junthy Valenzuela nga adunay 12 puntos.