Baby Jaguars mipukan sa CEC

Nag-agi una og kulba ang University of San Jose Recoletos (USJR) Baby Jaguars ug gikinahanglan nila ang maayong depensa una sila maka-ipsot batok sa mas kuratan nga Cebu Eastern College (CEC) Dragons sa iskor, 84-70 atol sa nagpadayon nga Cebu Schools Athletic Foundation, Inc. (CESAFI) kagahapon didto sa Cebu Coliseum.

Maayo na lang kay nasalbar nilang Clint Muñez ug Allan Dave del Rosario ang Baby Jaguars kinsa aduna nay 2-2 nga baraha.

Diha na sa third period nakahuygo og maayo ang Baby Jaguars aron pag-inat sa ilang labaw apan bisan pa niana, wala gihapon mo-surender ang Dragons kinsa daku unta’g purohan kung dili pa lang sila daghan og sayop ug makadaghan sab ma-ilogi sa bola.

Si Muñez, ang labing taas sa ilang team maoy nangu sa opensa sa iyang 28 puntos ug midugang si Del Rosario og 13 puntos.

Tataw kaayo nga wala gyud kaayo’y preparasyon ang Dragons ug ang ila rang gisaligan mao si Nolasco Cisneros III kinsa maoy nangu sa opensa sa iyang 24 puntos ug gawas pa niana, siya sab ang sinaligan nga point guard busa gikapoy na siya sa kadugayan ilabi na didto sa fourth period. Maayo na lang gani kay nakatampo si Albert Sy og 20 puntos aron pagpugong nga dili gyud sila malubong og maayo.

Ang Dragons nahagsa na sa 0-2 nga baraha ug pareho na sila karon og standing sa USC Baby Warriors ug DBTC Junior Greywolves.

Nagka-initay makadiyot sila si Joseph Baluyos sa CEC dihang iyang gi-igo sa bola si Clyde Heber Alob sa USJR kinsa hugot kaayong nakadepensa kaniya.

Puntos kada usa:

USJR (Jrs.) 84—Muñez 28, Del Rosario 13, Alob 10, Del Soccoro 9, Figues 9, Senining 5, Montecillo 4, Goc-ong 2, Llanos 2, Bayno 2

CEC (Jrs.) 70— Cisneros 24, Sy 20, Tan 11, Suazo 8, Tan 4, Tsai 2, Baluyos 1

Halftime: 39-all