Kawayan Mituhog sa PBA

Ang 19 puntos nga gihakot ni Jomar Angcon maoy nagtuboy sa Kawayan aron maangkon ang tam-is nga kadaugan batok sa PBA sa iskor 59-47 atol sa ilang engkwentro niadtong miaging gabii sa gipahigayong kampiyonato sa midget’s division sa Barangay Kasambagan SK Sports League 2008 didto sa Kasambagan Sports Complex, Kasambagan ning siyudad.

Usa ka unanimous nga desisyon ang giluwatan sa komitiba ug ilang gipili si Angcon nga makoronahan isip MVP tungod sa impresibong dinuwaan nga gipakita niiini gikan sa paghimugso sa torneyo hangtod kini nahuman.

Sa sayong bahin sa ilang engkwentro, gilubong na daan sa Kawayan ang PBA dihang miabante kini og 11 puntos nga labaw sa iskor 23-12 samtang sa ikaduhang kuwarter padayong nagkamang ang PBA ug nagpabilin nga nagtakilid samtang nagsapwang sa 11 puntos nga alkansi batok sa Kawayan sa iskor 34-23 pagkahuman sa first half.

Mipupo usab si Ranie Soquiño og 18 puntos aron panguluhan ang PBA apan wala kini makatandog sa labaw nga gihuptan sa Kawayan sa unang duha ka kuwarter.

Atol sa ikatulong kuwarter miwadwad ang PBA sa tuyo nga labnihon ang labaw nga gikumkum sa Kawayan ug milampos kini dihang gibuhian niini ang nagkayo nilang depensa ug opensiba hinungdan nga nagkatabla kini pagkahuman sa ikatulong kuwarter sa iskor 42-all.

Imbes maluya, gidoble hinuon sa Kawayan ang ilang paningkamot aron buk-on ang panagtabla. Niining higayona nagsinukliay sa ilang mga puntos ang duha ka koponan apan mipatigbabaw ang kabangis sa Kawayan ug ilang gidagit ang kadaugan.

Sukad niadto, wala na mulingi pa ang Kawayan ug mipatuyang kini sa pagbugsay hangtod nga napupos ang oras ug pabiling naglubog ang PBA.

Ang 12 puntos nga gitira ni Dahren Villegas maoy midugang sa 19 puntos ni Angcon aron panguluhan ang Kawayan samtang nahimong sinaligan sa PBA si Soquiño sa iyang 18 puntos  uban sa abag nila ni Ferdinan Saardino III ug Nikko Labares kinsa nagkumbuya sa 14 puntos.

Ang Barangay Kasambagan SK Sports League 2008 gipasiugdahan sa Sangguniang Kabataan gipanguluhan ni Hon. Erica Daag uban sa abag sa barangay council ubos sa liderato ni Bgry. Capt. Jose “Jun” Lim ug suporta ni konsehal Allan Daag, ang chairman sa Committee on Sports.

Puntos Matag Usa

KAWAYAN (59)  – J. Angcon 19, D. Villegas 12, M. Tuco 9, J. Gacasan 8, J. Sator 5, S. Tiera 4, K. Jumao-as 2

PBA (47) – R. Soquiño 18, F. Saardino III 7, Nikko Labares 7, A. Arceo 6, A. Roxelle 5, O. Arceo 4.

Quarterscores

23-12, 34-23, 41-41, 59-47