Norwood , de la Peña nag-ilog sa No.1 Draft Pick sa PBA
Ang Fil-Am nga si Gabe Norwood ug ang reigning NCAA Most Valuable Player nga si Kelvin de la Peña mao karon ang nag-una sa mga posibleng mulangkat sa No.1pick sa nagsingabut nga 2008 Philippine Basketball League (PBA) Rookie Draft karong Agosto 31 didto sa Market ! Market ! Mall ,
Daku na ang kahigayunan sa Fil-Am nga si Norwood nga magpapili sa umaabot nga PBA Rookie Draft human niya mapamatud-an nga usa siya ka tinuoray nga Filipino, Si Norwood gipanganak didto sa North Carolina sa iyang Filipina nga inahan nga si Tiffiney Sainte. Si Norwood niduwa sa George Mason University didto sa Estados Unidos una pa siya gikuha ni coach Chot Reyes aron muduwa alang sa Philippine Team sa 2007 William Jones Cup didto sa Taiwan ug sa FIBA Asia Championship didto sa Japan, gikan didto si Norwood gikuha sa Hapee Toothpaste aron muduwa sa Philippine Basketball League (PBL).
Sa laing bahin , ang star player sa Mapua Institute of Technology (MIT) Cardinals nga si De la Peña daku usab og kahigayunan nga mao ang mapili isip No.1 pick sa umaabot nga Rookie Draft. Ang 24 anyos nga si De la Peña nag-average og 15.7 puntos, 8.8 ka rebounds ug 5.6 ka assist . Kasamtangan karon siyang nagduwa sa PBL alang sa koponan sa San Mig Coffe.
Laing mga amateur player nga magpapili sa umaabot nga Rookie Draft mao sila si Pong Escobal sa San Beda College (SBC) Red Lions , ang 3-time PBL Most Valuable Player nga si Jason Castro , Mark Borboran sa University of the East (UE) Red Warriors , TY Tang sa De La Salle University (DLSU) Green Archers ug laing duha ka Fil-Am nga kasamtangan karong nagduwa sa PBL nga sila si Solomon Mercado ug Jared Dillinger.
- Latest
- Trending
