Panagdait-A, Paradise mag-ilog sa titulo
Hingpit na nga naangkon sa Panagdait-A ang katapusang luna sa finals human gipilde ang Kawayan, 101-95 sa nagpadayong Barangay Kasambagan SK Sports League 2008 niadtong miaging gabii didto sa Kasambagan Sports Complex, ning siyudad.
Ang Panagdait-A makigsangka batok sa Paradise sa kampiyonato karong gabii diha gihapon sa barangay sports complex.
Dobleng paningkamot ang gipakita ni Henry Mancera aron ihatod ang Panagdait–A ngadto sa kadaugan. Si Mancera kinsa kandidato sa lumba alang sa pagka-MVP milansang og 32 puntos.
Wala magdahom ang Panagdait-A nga ilang makuha ang kadaugan gumikan kay nabiyaan man kini og 18 puntos sa first quarter, 12-30. Sa sunod nga kuwarter mipabuhagay ang Panagdait-A aron paglaslas sa labaw, 28-38 sa first half.
Ang kuwatro puntos nga napasulod ni Mancera sa nahabiling siyete minutos sa ikatulong kuwarter maoy nahimong taytayan sa Panagdait-A aron maapsan ang Kawayan.
Si Joel Aniñon miposa sab og tres puntos aron mapahakan ang labaw sa Kawayan hangtod nga ilang naangkon sa hingpit ang labaw. Gikan niadto wala na motugot pa ang Panagdait-A nga mailog pagbalik sa Kawayan ang momentum.
Ang Barangay Kasambagan SK Sports League 2008 gipasiugdahan sa Sangguniang Kabataan gipangulohan ni Hon. Erica Daag uban sa abag sa barangay council ubos sa liderato ni Bgry. Capt. Jose 'Jun' Lim.
Puntos Matag
PANAGDAIT-A (101) -- H. Mancera 32, J. Aniñon 22, S. Codilla 16, L.Pepito 16, L. Pil 5, A. Sacil 5, Maano 5
KAWAYAN (95) -- J. Saberon 26, B. Heramis 25, E.Tuco 20, J.Lepiten 11, R.Tuco 7,
- Latest
- Trending
