Walay kabutangan sa kalipay sa Hannah sa ACY Poblacion, Asturias, Cebu human gilubong ang Looc Norte sa tinaktakay nga kampiyonato, 104-81 aron pagsakmit sa korona sa 2008 Asturias Inter-barangay Re-enforced Basketball Tournament niadtong Domingo didto sa nagsugwak nga Asturias Sports Complex.
Ang Hannah nagsalig sa ilang imports nga sila si Jessie Lumantas ug Neil Rañeses, kinsa maoy nangulo sa opensiba aron pagpukan sa Looc Norte nga gipangulohan sa ilang imports nga sila si Labares ug Lunday.
Gidominar sa Hannah ang tibuok duwa ug gani nakapanimaho na kini sa ilang sayong kadaugan dihang ilang gipahamtangan og 17 puntos ang Looc Norte, 75-38 paghuman sa third quarter.
Wala pa makontento, giinat pa sa Hannah ang ilang labaw sa fourth quarter aron pagseguro nga ilang maangkon ang titulo sa Lower barangay division.
Si Lumantas kinsa mipupo og 39 puntos maoy topscorer sa Hannah, gisundan ni Rañeses nga miani og 24 puntos. Samtang sila si Labares ug Lunday kinsa nagkumboya og 52 puntos mao sab ang nangulo sa naparot nga Looc Norte. Si Labares mihipos og 29 puntos, samtang si Lunday mi-ambit og 23 puntos.
Mi-okupar sa ikatulong dapit mao ang RMB Balcon human gipilde ang Poblacion All Stars.
Ang kampiyon sa Upper barangay division mao ang Brgy. Sta. Rita dihang ilang gipilde ang Brgy. San Isidro ug ang Brgy. Bog-o maoy miangkon sa ikatulong dapit pinaagi sa pagpukan sa Tapon Highland.
Puntos Matag Usa
HANNAH (104) -- Lumantas 39, Rañeses 24, Gonzales 14, Copas 8, Montebon 8, Alunan 6, Avila 3, Sususco 2
LOOC NORTE (81) -- Labares 29, Lunday 23, Tingal 7, Esmoni 6, Batulan 6, Aguanta 6, Trazo 2, Rallos 2