SWU nakatilaw na og daog

Nakatilaw sa ilang unang daog ang University of the Visayas (UV) Green Lancers ug Southwestern University (SWU) Cobras batok sa tagsa-tagsa nila ka kaatbang sa nagpadayong 8th Cebu Schools Athletic Foundation, Inc. (CESAFI) basketball season kagabii didto sa USC gym.

Ang rookie nga si Art Diango maoy bag-ong bayani sa Cobras  diin ilang gitumba ang opening day winner  ug  finalist sa miaging tuig University of San Carlos (USC) Warriors, 54-50 sa low scoring game, samtang ang UV Lancers nakabawi gikan sa ilang kapildihan pinaagi sa pag-ihaw sa University of Southern Philippines Foundation (USPF) Panthers, 77-74.

Bisan si Django ang nahimong bayani, apan si Alfred Belande maoy mitimon sa Cobras pinaagi sa pagkulit og nuybe puntos sa fourth quarter aron pag-angkon og siyete puntos nga bentaha, 48-41 sa nahabiling 5:37 sa duwa. Si Belande mitapos sa duwa bitbit ang 15 puntos, 13 rebounds ug upat ka assists.

Ang Warriors gipangulohan ni Joven Cid Cortes sa iyang 15 puntos, gisundan ni  Enrico Llanto nga adunay 13 puntos.

Sa sayo pa, si Ritchum Dennison mipatuasik sa iyang mahinungdanong  3-point shot  aron hatagan ang UV Lancers og tres puntos nga labaw, 76-73 sa nahabiling 15.2 segundos sa duwa. Napasud sab niya ang usa sa duha niya ka free throws nga may 7.7 nahabiling aron pagselyado sa kadaugan.

Si Dennis, kinsa wala makaduwa atol sailang 76-80 nga kapildihan ngadto sa USC  Warriors maoy topscorer sa UV Lancers sa iyang 18 puntos, samtang ang  USPF   gipangulohan ni Renato Gulane sa iyang 18 puntos.