Daryl Smith mipanaw na

Ang  Amerikanong basketbolista nga ania magbase sa Sugbu nga si Daryl Smith mipanaw na sa miaging adlaw dihang giatake kini sa kasingkasing. Namatay siya sa edad nga 53 anyos.

Ang 6-foot-9 nga si Smith, kinsa import kaniadto sa PBA, niduwa  pa niadtong Martes sa gabii diin siya niduwa sa Team Consolacion sa usa ka exhibition game batok sa Liloan-based Designer ni coach Edcel Vallena.

Mga tinubdan sa Mandaue City Hospital diin si Smith gideklara nga “dead on arrival”  wala mohatag og katin-awan sa hinungdan sa kamatayon niini, apan gikompirmar nga heart failure tungod sa sobrang kahago kon over fatigue. Si Smith gikan  pa sa  Bohol nianang adlawa diin siya niduwa isip import  sa local teams ug dayon niduwa sa Liloan nianang pagka-gabii.

Si Vallena kansang team nidaog, 82-76, mitug-an dinhi sa Banat News nga atol sa maong duwa, si Smith nigawas sa gym singko minutos pa ang nahabilin sa third quarter. Niduwa lang siya kadali  sa fourth quarter apan wala na mobalik og duwa  ug naglingkod na lang sa bench hangtod nga nahuman ang duwa.

Sa iyang pag-uli sa ilaha sa Consolacion, si Smith nagmulo nga sakit ang iyang dughan hinungdan nga gihaplasan kini og pain reliever sa iyang teammates nga silang Gilbert Demape ug Arturo Pepito, Jr. nga nakahupay sa balatian niini.

Human niadto, nanggawas sila aron mohigop og init nga sabaw sa noodle ug niadtong higayona kalit  lang natumba si Smith. Sa kahadlok sa uban niyang kaubanan, si Pepito mialsa ni Smith ug iyang gipasakay sa ambulansya paingon sa Mandaue City Hospital, apan nakabsan kini sa iyang kinabuhi pag-abot sa maong tambalanan. 

Si Smith daku’g natabang sa dili maihap nga kampiyonato nga nahipos sa M. Lhuillier Jewelers sa commercial league.

Tungod sa iyang gugma sa basketbol ug panginabuhi padayon siyang niduwa isip import sa mga provincial tournaments ilabi na sa Mindanao.