Nasanta na sa AC Sports ang pagdominar sa Triple-A All Stars pinaagi sa pag-iskor og 64-54 nga kadaugan aron pagsakmit sa kampiyonato sa Triple A Summer Basketball League niadtong Domingo didto sa Kimwa gym sa dakbayan sa Mandaue.
Ang AC Sports nilabaw lang og dos puntos sa paghuman sa third quarter, 49-47, apan ang kanhi pro cager nga si Larry Villanil nangulo sa 17-5 nga rally aron pag-inat sa labaw sa fourth quarter.
Si Villanil nakakuha og suporta gikan nilang Rany Cruz ug Ajie Quijano sa pagpugong sa Triple A aron dili na makasikit og balik. Sila si Villanil ug Quijano pulos miposa og 12 puntos alang sa AC Sports.
Si Adriano Gogo maoy nangu sa Triple A sa iyang 14 puntos, samtang si Nilo Romagos midugang og 10 puntos.
Sa laing bahin, ang AC Sports nipukan sa McMill alang sa ilang ikalimang daog sa pito ka duwa sa Guadalupe Athletic Association (GAA) 9th Founder’s Cup didto sa Guadalupe Sports Complex.
Gumikan sa maong kadaugan, ang AC Sports seguro na sa quarterfinal round sa ilang 5-2 win-loss nga baraha.
Si Rene Escuyos mibahog og 30 puntos, samtang sila si Serge Cortes, Rey Lopez ug Sencio Ibo pulos mitampo og double figures.
Si Sam Llevado mipupo og 21 puntos aron pangulohan ang McMill, gisundan ni Danny dela Peña sa iyang 19 puntos.
Sa laing aksiyon sa GAA, ang Evan Hulga Hardware midaog batok Aqua Serv, 80-76, ang Sign Post midaog batok sa MGR, 70-64 ug ang SWAN mipakurat sa mas paborito nga Pecus Stallions, 75-63.
PUNTOS MATAG USA
AC Sports (64) -- Villanil 12, Quijano 12, Armamento 11, Cruz 10, Retiza 4, Martinito 4, Baba 4, Taborada 3, Ganda 2, Quilab 2, Villamor 2
Triple-A (54) -- Gogo 14, Romagos 10, Agbay 8, Almario 6, Dimpas 4, Tabaña 4, Gumos 3, L. Budiongan 3, E. Budiongan 2