Nagkapundok ang mga Pinoy kinsa atua na karon nanimuyo sa New York City atol sa gipahigayong Astoria Queens basketball tournament nga gisugdan Domingo, Agosto 3 didto sa Elmcor gym.
Kasagaran sa mga Pinoy nga mahiligon og basketbol taga-Sugbu.
Si event organizer Dodong Endrino Jr. nga lumad sa Minglanilla, Cebu mibutyag pinaagi sa long distance nga 10 ka teams ang nisalmot sa nahisgutang torneyo diin upat niini gilangkuban og mga Sugbuanon lakip na sa taga Mindanao.
Ang Cagayan de Oro nipalista sa ilang Team A ug Team B, NYC Bomb Squad ubos ni playing coach Allan Ceniza, Minglanilla team nga gipangulohan ni Endrino, Batangas ug ang Bulacan-Telsite.
Matud pa ni Endrino ang registration nagkantidad og $2,000 diin ang makampiyon hatagan og ganting salapi ug ingon man tropeyo. Ang tanang sakop sa champion team hatagan sab og ganti.
Gitug-an ni Endrino nga ubay-ubay nang mga retiradong players gikan sa PBA ug mga kanhi varsity players dala ang ilang pamilya ang atua na manimuyo sa New York ug sa California
Si Endrino mibutyag nga human sa Astoria Queens basketball tournament, mopahigayon sab sila og East Coast-Inter-City basketball tournament karong Septiyembre 1-2 didto sa Ottawa, Canada. Ang Florida team maoy usa sa labing lig-on nga team gumikan kay anaa man nila si ex-UV Lancers Lowell Briones ug Edward Naron ug ex-SWU Cobra Delfin Rizane.
Sa West Coast, ang California maoy labing lig-on tungod nilang Rey Yncierto, Jofrey Macoy, Percius Curugan ug uban pang mga kanhi PBA players.